Bteng ki 4 seng ban ialap pyrshah CAA bad dawa ILP ha Meghalaya

Nongpoh: Ki saw tylli ki kynhun sengbhalang ba paw hapoh ka jylla, kiba kynthup ia ka KSU, FKJGP, HYNF bad ka RBYF, ki dang iai bteng ban pynshai paidbah halor ka jingpyrshah ia ka CAA bad ha kajuh ruh ka por kaba long kum ka jing dawa, na ka bynta ban pyntreikam noh ia ka ILP hapoh ka jylla.

Kat haduh mynta, ki heh nongialam jong kitei ki saw tylli ki kynhun sengbhalang, ki la pynlong jingialang paidbah ha kiba tylli ki jaka ba kham bun paid ha Ri Bhoi, kata ha Umsning, Nongpoh, Byrnihat, Umden bad mynta ka sngi ha Patharkhmah, ka jaka kaba long pdeng ia ki shnong kiba don ha Ri Bhoi Sepngi.

Ha ka jingialang ban pynshai paidbah kaba la long myn hynnin ka sngi ha Patharkhmah, la sakhi u samla Donald V.Thabah, General Secretary ka KSU, Sengkmie, u Bah Sadon Blah, General Secretary ka HNYF, u Bah Bipul Thangkhiew, President ka RBYF, u samla Kitboklang Nongphlang, Chief Organizer ka FKJGP lem bad kiwei pat ki nongialam sengbhalang ba hakhmat ha Ri Bhoi.
Ha katei ka jingialang jong kitei ki saw seng, la iohi ba ki la don da ki spah ngut ki paidbah ka thain Ri Bhoi Sepngi, kiba la wan ban kyrshan ia katei ka jingialang bad ruh ban sngap ia ka jingpynshai na kitei ki nongialam sengbhalang.