Bteng ka Meghalaya ha ka Ranji Trophy, da kaba buddien ia ka Mizoram

Shillong:Ha ka lympung Ranji Trophy ba la ialeh ha Anand, Gujarat, hapdeng ka Mizoram bad ka Meghalaya la iohi ba ka Mizoram ka la jop ha ka jingkynting pisa bad ka la jied ban tied shuwa ha ka inning kaba nyngkong jong ka bad ka la kamai haduh hynnin ka sngi ha shuwa ba kan shah pynkut noh da 359 run. Ha ka pali tied jong ka Meghalaya pat, hynnin ka sngi ka la lah ban kamai shuwa tang 220/5 da kaba buddien sa kumba 139 run nadien ka Mizoram.

Haba ka Meghalaya ka la sdang ia ka jingtied bol ha ka inning kaba nyngkong jong ka, u Raj Biswa u dei uba la iaineh ha ka jinglehkai da kaba kamai 94 run hadien ba u la duh shuwa ia arngut ki paralok ha kaba sdang jong ka jinglehkai, hynrei u la ioh noh ka jingkyrshan na u Kishan Lyngdoh uba la kamai 47 na ki 84 bol bad kine shijur ki la ianeh paralok da 71 run na ka bynta u wicket uba lai.

U Raj uba la ioh 216 bol u la thlieh phra tylli ki 4 bad kawei ka 6, bad hadien ka jingkhyllem noh jong u Kishan, u la ioh shuh ban pynkamai sa 53 run na ka bynta ka kynhun ha ryngkat bad u Jaskirat Singh Sachdeva uba la tied 21 na ki 46 bol. Shuh shuh hadien kane u la neh biang ban pynkamai shuh sa 61 run na ka bynta u wicket uba hynriew ha ryngkat bad u Ram Gurung uba la ioh kamai shwa 32 run na ki 61 bol.

Ka Mizoram kaba la bteng shuwa ia ka jinglehkai ha ka step kaba mynnin ka sngi, ka la ioh ban ialehkai tang 11.1 over hadien ba ka la kamai 359 run bad liem lut baroh ki wicket. Haba ianujor bad ka Meghalaya kaba la pyndonkam tang ki nongialehkai kiba na la ka jylla, ka Mizoram ka dang iai bteng ban pyndonkam ia ki nongialehkai kiba nabar bad napdeng kine, u Agni Chopra u dei uba la tied bun da 105 run na ki 90 bol hadien ba un shah weng noh ha ka bol jong u Akash Kumar Chou dhury uba la ioh shuwa ia ka poin ha ka inning kaba nyngkong da 4/79 ha ki 23 over. Nalor jong u ki don sa arngut kiba la ioh half century kata u Hruaizela (57) bad u Vikash Kmr (67 run), hynrei kitei ki nongtied ka Mizoram ki la hap noh ha ka spin bol jong u Arbin Singh (2/92 ha ki 24 over) bad u Raj (1/28 ha ki 6 over). Kiba la ioh shim wicket ki kynthup ruh ia u Swara jeet Das (1/30 ha ki 14 over), Jaskirat (1/34 ha ki 9 over) bad u Dippu Ch Sangma (1/57 ha ki 13 over).