Bteng ka KSU South West, ban iarap khaw sha kiba bun ki long iing

Shillong: Ka Khasi Students’ Union, South West Khasi Hills District lyngba ki shnat treikam bapher bapher jongka, ki la iaibteng ban iai noh synniang sha ki longing na ka daw ka jingdon ki jongka pakhang shnong.

Na ka liang jongka KSU Warsan Lyngdoh Circle bad ka KSU Nongummer Unit, ka la ioh ban iarap da u khaw sha ki 38 Tylli ki longing jongka shnong Nongummer, ka shnong kaba don kham ha kyndong jongka South West Khasi Hills District. Nangta, na ka liang jongka KSU South West Khasi Hills District, ka KSU Umdohlun Circle bad ka KSU Photumiap Area Unit ki la leit ban hiar ruh ban leit iarap sha ki 25 tylli ki longing jongka shnong Photumiap, Langpa bad New Phanwer. Shuh ka seng ka la ioh ban iarap ruh ia kawei ka longiing ba ngat ha ka jingpluh ding hapoh kane ka thain ha ka jingiadon lang jong u samla Aiciless Lyngdoh, Executive Member jongka KSU South West Khasi Hills District, u samla Daman Syrman, Organising Secretary KSU Umdohlun Circle, ki dkhot ka KSU Umdohlun Circle bad kiwei kiwei.

Dang ha kane ka taiew ba lahdep ka KSU ka la ioh ban leit noh synniang da u khaw sha ki longing ka shnong Pyndengumjarain 26 ing, shnong Marshan 15 ing bad shaki ki 8 Tylli ki longing haka shnong Domiasiat, South West Khasi Hills District

Shuh shuh na ka liang jongka seng ka kyntu ruh iaki bor sorkar ban pynkloi ka jingai jingiarap sha kito baroh ki briew ba bylla, ki nongtrei NREGS bad kiwei kiwei kumba ka sorkar ka la kular ban ai jingiarap. Ka KSU ka kwah ban pynsngew sha ki bor ba dei peit ba ka long kaba donkam ia ka sorkar ba kan pyllait noh kloi ia ka song jingiarap ha kane ka por ba dang don ka pakhang shnong, namar dei ha kane ka por ba ki paitbah ki mad ia ki jingjynjar na ka daw ka jingbymdon ka bylla ka sngi kaba biang.

Ha kajuh ka por ka KSU South West Khasi Hills District ka kyntu ruh ia ki wholesalers bad dealers ba pynpoi khaw ha ki shnong ki shnong na bynta u khaw AAY, PHH bad NFSA ba kim dei ban ot kilogram ia u khaw ba dei ban sam sha ki paitbah, khnang ba jan kham long jingmyntoi iaki paitbah ba dei ban ioh khaw rashon.