Bteng ka CoMSO ban pyntreikam hi ia ka ILP da kaba talasi briew

Nongpoh: Naduh myn shisngi, ki nongialam bad ki dkhot na ki katto katne tylli ki kynhun sengbha lang hapoh ka shatri ka Confederation of Meghalaya Social Organizations (CoMSO), ki la sdang ia ka jingpyntreikam hi ia ka ILP hapoh ka jylla bad kata ka long ban talasi ia ki briew nabar kiba wan rung shapoh ka jylla, kumta haba phai ha Ri Bhoi, katei ka jingtalasi ka dang iai bteng tad haduh mynta, ha kaba ki dkhot jong ka CoMSO, ki dang don ha katei ka jaka talasi mynder kaba don ha Byrnihat, da kaba ki ap ym tang ha ka por mynsngi, hynrei wat ha ka por mynmiet ruh kumjuh.

Haba iadei bad ka jingtalasi ha Byrnihat Infiltration Check Gate, la iohi ba kitei ki dkhot hapoh ka shatri ka CoMSO, ki la ap beit khui ha katei ka jaka bad kiba la synranlang ia ki Pulit kiba ap ha katei ka jaka, da kaba peit siar ruh ia ka rukom talasi briew nabar da ki Pulit kiba don ha katei ka jaka.
Ha Byrnihat hi, kam shem la don kano kano ka jingia huri hura bad la iohi ba ka iaid beit iaid ryntih kumba ka long, hynrei ka jingshah pynphai ia ki briew kiba nabar bad ki bym don ia ki kot ki sla ka duna bha, haba ianujor bad ka jingdon jong kiba shah pynphai hynnin ka sngi.
La ioh jingtip ba hynnin ka sngi, ka jingdon jong ki briew nabar kiba la shah pynphai dien trai ka la don kumba 60 ei ei, hynrei mynta ka sngi ka la kham duna, ha kaba ki la don tang kumba 20 ngut ei ei.