Btai ki 13 seng ban ap ia ka komiti khang mynder ka sorkar

Shillong, 5 Naiwieng:
Ki 13 sengbhalang ki la sngew btai ban ai sah ia ka jingpynslem ka sorkar ban pyntreikam ia ka ain khan rung ia ki mynder sha kane ka jylla.
Kine ki sengbhalang ki la bitar jur ia ka sorkar jylla kaba pynslem ban pyntreikam khamtam ia ki komiti ba la thung kiba khlem pat dep haduh mynta ban leh ia ka kam.
“Imat ka sorkar ka sorkar ka dang buh ha synduk pyndait thah ia ki kaiphod jong ki komiti namar ba ka por ba la buh ban pyndep ia ka kam jongki, ka la kut”, la ong u president ka Federation of Khasi Jaintia and Garo People (FKJGP), u Bah Joe Marwein ha kane ka sngi Balang.
Ka sorkar mynshwa ka la thung ia ki komiti ban wad ia ki lad ki lynti kumno ban tehlakam ia ka jingwan rung beain ki briew ha kane ka jylla.
“Ka por ba la buh ar bnai ka la kut bad la tip ba kine ki komiti ki la dep aiti ia ka kaiphod sha ka sorkar hynrei ka sorkar ka shu sngap haduh kine ki sngi”, la ong u President ka FKJGP.
Ka sorkar ka la thaw ia kine ki komiti hadien ba ki sengbhalang ki la dawa ban pyntreikam da ka Inner Line Permit ha kane ka jylla.
“Ngi kwah ba ka sorkar ka dei ban ai jingshai aiu ka la leh hadien ba la ioh ia ka kaiphod jong ki komiti bad ka dei ruh ban sei madan ia ka jingai jingmut ba la ai da kine ki komiti khnang ban iatip paidbah”, la ong u Bah Marwein.
U la ong ba ka sorkar ka dei ban sei ia ki lad ki lynti ba ka thmu ban pyntreikam na ka bynta kane ka jingthmu.