Brup jaw ummat U CEM KHADC ha Iing Dorbar   

Shillong, 22 Rymphang:
Namar ka jingkhluit palat ka dorbar KHADC hapdeng u bah H.S Shylla MDC ka Nongkrem bad u CEM ka KHADC bah Pynshngaiñ N Syiem, ha kine ki ar sngi ba la dep ha kaba la mih ka jingiakdew kti iwei ia iwei, ka jingiatied miej bad la i kumba kitei ar ngut kin shu ia kynrup noh, ka la pynlong ia ka tnat dorbar jong ka KHADC ban pyn kham ia jngai noh ia ka jaka shong jong kitei ar ngut. Ha kine ki ar sngi ba la dep u bah Shylla u la shong ha ka jaka ba shakhmat kaba don marjan bad u CEM, hynrei mynta ka sngi kaba dei ruh ka sngi ba u wanrah ia ka NC la pynkynriah noh ia ka jaka jong u jngai na u CEM kata la rah noh shaduh ka jaka shong kaba don ha u laiñ ba khadduh.
Hynrei hadien ka dorbar haba kren sha ki nongthohkhubor u bah Shylla u la ong ba u la kyrpad dalade hi ban kham pynjngai ia ka jaka shong jong u na u CEM, namar ba um kwah ban long kumba long ha ki ar sngi ba la dep, ioh ka mih pynban kano kano ka jingjia kaba ym kwah ban jia. La iohi ba ha katei ka dorbar u CEM bah Pynshngaiñ u la jaw ummat bad u la ïam katba u EM Finance u bah Antonio War u dang kren iaroh ia ki kam u bah Pynshngaiñ da kaba kdew ba u bah Pynshngaiñ u dei u nongialam uba trei na bynta ka jaitbynriew.