Brup jaw ki um mat, mar ia poi ha kliar lum Everest, ong ka pulit Wansuk

Shillong, 4 Jylliew:
“Ki um mat jong nga ki hap jrup rup-rup mar ia poi ha kliar u Lum Mount Everest” la ong ka pulit Wansuk Myrthong.
“Halor u kliar lum Mount Everest nga ioh ia ki met iap jong ki nong-China”, la ong ka kong Wansuk kaba wan poi ha nongbah Shillong hynne ka sngi hadien ba la pyndep ia ka jing kiew ia u lum Mount Everest.
Ka kong Myr thong ka la ong ba ka la kiew ia u lum bad ka jingangnud ka la urlong shisha da kaba lah ban pyndep.
Ka la ong ba ka sngew sarong ban long kum ka kynthei Khasi ba nyngkong ban kiew ia u lum Mount Everest.
Ka la ong ba la duh ia ka lad shisien ban kiew ia u Everest ha u snem 2009 bad mynta ka lad ka la wan biang ia ka haduh ba kan jop syndon. Ka Kong Myrthong, kawei na ki kynthei Khasi ba nyngkong ka la jop ban kiew haduh kliar u lum Mount Everest.
Katkum ka jingong kane ka kynthei Khasi ba 30 snem ka rta kaba dei ruh ka pulit langrut jong ka Meghalaya, ka dei napdeng ki 16 ngut ki nongkiew lum na kane ka thain North East ban shim ia kane ka thong kaba la tip kum ka First North East India Top Expedition, 2013.
Ia kane ka jingkiew lum, la khaweh lama da u President Pranab Mukherjee na Rastrapati Bhavan ha ka 20 tarik Lber.
Ka kong Myrthong ka don ha ka kynhun lem bad hynriew ngut ki nongkiew lum kynthup David Zohmanggaiha na Mizoram, Kazi Sherpa na Sikkim, N Chingkheinganba na Manipur, Tarun Saikia na Assam bad Anshu Jamsenpa na Arunachal Pradesh. Ki la poi ha kliar u lum ha ka por 8.30 baje mynstep ha ka 18 tarik Jymmang.
Ka la pynpaw ia ka jingsngew nguh ia u Blei uba la iarap ia ban jop ban poi sha kliar u lum ba jrong tam ha ka pyrthei.