Bret pathar ia ki bilor drip bad thyrnia injek ha ka shnong Mawlait

Nongstoin, 11 Naiwieng:
Ka seng HANC ha ryngkat ka FKJGP Maweit Circle, myn ha ka sngi balang jong ka taiew ka la leit ban jurip ia kawei ka jaka ha ka shnong Mawlait ka shnong kaba don ha lynti ban leit sha Maweit bad ha katei ka jingleit jurip kitei ki ar seng kila lap ia ka jingleh torti jong ki briew ka Hispital ha kaba kila shu wan bret pathar ia ki jakhlia kiba la dep pyndonkam na katei ka jaka.Ha katei ka jingleit jurip jong kitei ki ar seng hapoh ka jingialam jong u samla Anthony Umiong President FKJGP bad u samla A. Wahlang president HANC Maweit circle, ki la pynpaw ka jingsngewkhia halor katei ka jingleh torti ki nongtrei ka Hospital bad kiba bun ki jakhlia kiba la wan theh ia katei ka jaka ki dei ki bilor drip bad thyrnia injek kiba la dep pyndonka na Hospital.Haba iakren sha ki nongthoh khubor, na ka liang jong u samla A. Wahlang u la ong ba katei ka jingwan bret ki briew ka Hospital ia kitei ki jakhlia ka buh jingma ia ki nongshong shnong bad khamtam ia ki khynnah ki bym tip ei ei kiba la leit ban khar ia kitei ki bilor drip bad thyrnia injek ban ialehkai da kaba ki tan um bad dih ruh ha ka shyntur.
Shuh shuh u la ong ruh ba na ka liang jong kitei ki ar seng ki ai por ia ki bor kiba dei peit ia ka Civil Hospital Nongstoin ba kin wankhat noh hapoh ka 1 bnai lem kumta na ka liang jong ka JAC jong kitei ki ar seng kan leit khat khongpong ia u tei u niut bad leit theh ha katei ka Hospital.