Bom iap, ia 2 ki snar dawa pisa

Shillong, 19 Jylliew:
2 ngut ki snar dawa pisa ki la shah bomiap mynta ka sngi ha ka shnong Rongjeng , East Garo Hills, kaba jngai 45 kilomitar na Wiliam nagar, katei ka jingjia ka la jia ha ka por 1 baje myn sngi ha kaba ki paidbah nong shong shnong katei ka shnong ki la beh thong ia ar ngut ki nongdawa pisa haduh ba kin da lap bad ki la bom iap syndon ia ki. La iathuh ba 5 ngut ki briew ki la poi sha katei ka shnong ban dawa pisa na ki paidbah, ha kaba ki paidbah ki la ialeh pyrshah bad kthong kylla ia ki bad haba kthong ia ki ki paidbah ki la ioh bat tang 2 ngut katba 3 ngut pat ki la phet krad. Kitei ki 2 ngut kiba la shah bomiap ki dei kiba la tip kyrteng kum u Senstar Marak, 23 snem na ka shnong Rongjeng bad u Lakingbat Marak, 23 snem na ka shnong Gauram ka shnong kaba marjan bad ka Rongjeng. Kitei ar ngut ki dei ki nong wan lum ia ki pisa dawa na ki nongkhaii bad ki trai dukan kyiad na ki shnong ba marjan bad ka Rongjeng. Ki pulit ki la suba jur ba kitei 2 ngut ki lah ban dei ki dkhot ka A’chik Matgrik Elite Force (AMEF). Hadien ba la ioh jingtip shaphang ka jingwan tur ki nong dawa, ki pulit ki la sma lypa ba ka lah ban don ka jingbom shnong u paidbah, bad wut wut ki la mareh sha katei ka jaka hynrei haba ki la poi ki la lap sa tang ka metiap, bad ki la rejistar case ia katei ka jingjia. Lah ban pynkynmaw ba dang shisnem mynta 5 ngut ki nongdawa pisa ki la shah bom iap ha kate ika juh ka shnong, katba ha kawei pat ka khubor kaba la iohlum dier por la ong ba ki paidbah ki la bom la tied ia uwei u dkhot ba la pyndem wait ka GNLA ha ka sngi hat majai ha Resubelpara, North Garo Hills.