Blad ka rakhe sngi nonghikai, ba deng lama iong ki nonghikai deficit

Shillong: Ka jingrakhe ia ka sngi ki nonghikai ha ka nongbah kala kylla blad rong noh namar ba ki nonghikai deficit hapoh ka lama ka KJDSTA bad GHDSTEA kila pynlong ia ka jingdeng lama iong ban pynpaw ia ka jingsngewsih ba ka sorkar kam shym la pyllait ia ka tulop arrear kaba la 25 percent nalor ka jingioh tulop kaba shisien ha ka 3 ne 4 bnai.

Myn hynnin ka sngi katba ka sorkar ka iaroh da ki ktien sbai ktien rupa ia ki nonghikai ha ka jingialang hapoh ka hall ka State Central Library, Shillong ia ka sngi ki nonghikai ne teachers day, hynrei ki nonghikai deficit pat ki sngewsih ki khuslai namar ba kim pat ioh ia ka arrear kaba dei ka bynta ka tulop. Kine ki nonghikai ki ia deng lama iong habar ha phyllaw ka State Central Library.

Halor kane ka jingiakhih ki nonghikai, u myntri ka tnad pule puthi u bah Lahkmen Rymbui, u la ong ba ka sorkar kam shym la klet ia ki nonghikai hynrei ka shem jingeh bym don pisa. Ula ong ba ki nonghikai ki don ka hok ban dawa bad ka sorkar kan thaw ki lad kumno ban pynbeit ia ki jingeh jongki.
“Nga kyrpad ia ki nonghikai ba kin sngewthuh lang namar ba ngim kwah ba kaba ngi leh kan pynbeit ia ka jingeh tang shi por hynrei kan long junom”, ula ong u bah Lahkmen.
Ula ong ba kum u myntri um kwah ba ki nonghikai kin sngewsih hynrei ka sorkar kan shim ia ka jingkitkhlieh ban pynbeit ia ki jingeh jong ki nonghikai wat hapdeng ka jingeh ba ka iakynduh.
“Ngim kwah ba ki nonghikai kin sngewsih, hynrei ki dei ban sngewthuh ba ngi don ruh ka jingeh bad katba nga dang don ha kane ka shuki nga kwah ban pynbeit ia ki jingeh ki nonghikai” la ong u bah Lahkmen bad bynrap ba ki nonghikai ki don ka hok ban pynpaw ia ki jingeh jongki.
Ha kajuh ka por, u president ka KJDSTA u Babu Kular Khongjirem ula ong ba ki nonghikai hapoh ka lama ka KJDSTA bad GHDSTEA, ki la deng lama iong ban pynpaw ia ka dak jingsngewsih ia ka jingbym pyllait ka sorkar ia ka 25 percent ka arrear, nalor kiwei ki mat jingdawa.
U la ong ba ki nonghikai kim kwah ban ialeh pyrshah ia ka sorkar, hynrei ka dei ka jingkyrpad ba ka dei ban pyntreikam noh ia ki mat ba la pdiang bad phah da ka 5th Pay Commission ban pynioh ia kiba bun ki jingmyntoi ia ki nonghikai.
“Ka 5th Pay Commission kala pdiang ban pynrung ia ka jingsiew tulop thymmai ia ki nonghikai, ba la mynjur ruh ka cabinet”, la ong u Babu Kular.
U la ong ba ki nonghikai ki dawa ban pynheh ia ka DCRG, ban pynioh bai sumar, ban ai shuti ia ki nonghikai deficit ba ioh khyllung, ban pyntreikam ia ka ACPS, bad kiwei.
Hynrei kawei kaba kyrkieh ba ki nonghikai ki dawa ka long ban pynioh ia ka tulop kaba man u bnai ym shuh shisien ha ka 3 ne 4 bnai, la ong u president ka KJDSTA.
Ka Sorkar jong ka Jylla mynta ka sngi ka lah pyn kup burom ia kumba 20 ngut ki nonghikai jong ki skul na kylleng ka Jylla Meghalaya ha ka jing rakhe ia ka ‘State Level Teacher Day’ ha Shillong.
Ha kane ka sngi ka jing pynkup burom ia ki nonghikai lah wan shim bynta u myntri ka pule puthi u Ma Lakmen Rymbui lem bad ki nonghikai bad kynnah skul na kylleng ka jylla.