Bitar U Mukul ba mih paidbah, ka shithi ba u phah sha ka Sonia Gandhi

Shillong, 1 Jylliew: Kawei na ki lad pathai khubor ha ka ri ka NDTV, ka la ioh ia ka shithi ba u Dr.Mukul Sangma, u la thoh sha ka President jong ka AICC ka Sonia Gandhi bad kumjuh ruh sha u Vice President u Rahul Gandhi. Ki jingthoh kiba don ha katei ka shithi, kat kum ka jingbatai katei ka News Channel ki jrong haduh lai sla.
Ha katei ka shithi, kat kum ka jingpyntip khubor ka NDTV, kaba la ai Live Telecast mynta ka sngi ka la iathuh ba U Dr.Mukul u la thoh sha ka Sonia ban pyntip ba ki don bunbah ki nongialam ka seng Congress na kane ka jylla kynthup ia u nongialam rangbah u Dr.D.D Lapang, ki la leit ban ia kynduh ia u Himanta Biswa Sarma u nongialam barim ka Congress ha Assam uba la leit ia soh sha ka BJP bad ka NDTV ka la batai ruh ba U Dr.Mukul u la thoh ba kitei ki nongialam Congress ki la leit ruh ban ia kynduh ia u National General Secretary jong ka seng BJP u Ram Madhav.
Ka NDTV kaba la ioh ia katei ka shithi ka la iathuh ba u Dr.Mukul u la pyntip ruh sha ka Sonia Gandhi ba u MP Lok Sabha ka Shillong Konstitwensi u bah Vincent Pala u la leit ban ia kynduh bad ki nongialam ka BJP. Nangta la ong ba ka jingthoh u Dr.Mukul ka la batai ba ka seng Congress ka don 30 ngut ki MLA ha ka ing dorbar kaba 60 ngut ki MLA bad u la iathuh ba don ki myntri sorkar ruh ki la wanrah da ka buit ban pyniapher hapdeng ki Khasi bad ki Garo.
Ha ka Live Telecast ba ka NDTV ka la pyni mynta ka janmiet, kawei ka nongai khubor, ka la ia kren ruh bad U Dr.Mukul da ka phone kaba la pyniohsngew ia ka sur ia kren sha ki paidbah. Ha katei ka jingiakren u Dr.Mukul um shym la ailad ia ka ban kylli jingkylli, hynrei u la tih beit ba ka dei ban batai naei ka ioh ia katei ka shithi jong u, “Kumno phi ioh ia katei ka jingtip, ka dei ka kam pohing jong ka Party” kren bitar u Dr.Mukul ha katei ka jingiakren phone.
Katei ka nongkren khubor ka la iathuh ba ka ioh lyngba ki tyllong khubor jong ka hynrei u Dr.Mukul u iai ban beit da kaba ong, “Kumno te phi ioh ia katei ka jingtip”. Katei ka nongkren khubor ruh kam shym la treh ban iathuh naei ka ioh bad hangtei u Dr.Mukul u la bitar ia ka bad u la ong “Ka dei kaba la phah lyngba ka Email shimet jong nga hi, kata ka mut phi la leh tuh ia ka email jong nga” u la kren bitar.