Nongpoh: U Bah Mayrald Born Syiem, MLA Nongpoh, u la ther tyngeh ia ka sorkar jylla halor ka jingkular kai ban pyntreikam noh ia ka jaka sumar ia kiba pang COVID-19 ha Ri Bhoi, namar kat haduh kine ki sngi, kata ka jaka sumar ia kiba pang COVID-19 ha Ri Bhoi kam pat la urlong satia.
Haba ther tyngeh ia ka sorkat jylla, u MLA Nongpoh, u la ong ba ki jingkular ka sorkar lyngba u Conrad K. Sangma bad u myntri ka tnad ka koit ka khiah, ban pyntreikam ia ka jaka sumar pang COVID-19 ha Ri Bhoi, ka la shu kut ha ka jingkular jong ki bad ym shym la iohi dak ei ei ruh em ban pyntrei ia kata ka jaka sumar bad uba la ong ruh ba kane ka sorkar, ka la shukor im im peit peit ia ki paidbah hapoh ka Distrik bad jylla hi baroh kawei.
U MLA ka Nongpoh, u Bah Mayral Bom Syiem kumba la mih ha ka lad pathai khubor mynta ka sngi ba u Commissioner Secretary ka Health department u la kam ba ka tnad ka koit ka khiah ka a long kaba la khreh ban ïakhun pyrshah ïa ka khlam covid-19 bad khamtam na ka bynta ka jingwan ynshop ha ka sien ka balai (Third wave) bad ha ka jingshisha pat ka dei tang ka jingkam na rmiang shyntur khlem ki kam.
Shuh shuh, u Bah Mayrald Born Syiem, u la ong ruh ba kumno ba ka sorkar kan iakhun ia kata ka (Third wave) jong ka khlam covid-19, namar kumba ka long mynta ka Ri Bhoi, ka la shah ktah shikatdei eh ha ka khlam COVID-19, hynrei kat haduh mynta ka sorkar kam pat pynurlong satia ia katei ka jaka sumar ia kiba pang COVID-19, kaba ka sorkar hi ka la kular ban pynkylla shipor ia ka MCH Hospital kaba don ha Umran Niangbyrnai sha ka jaka sumar pang COVID-19.
U Bah Mayald Born Syiem, u la kyntu ia ka sorkar jylla ba ka dei ban pyntreikam noh shen ia ka jaka sumar ia kiba pang COVID-19 kaba don ha Umran Niangbyrnai bad uba la kynthoh ruh ia ka sorkar jylla ba kam dei ban shu kular ia ki paidbah tang ha ki lad pathaikhubor, namar kumba ka long mynta ka Ri Bhoi ka la shah ktah eh ha ka khlam COVID-19 bad kaba la donkam eh ia ka sorkar ba kan shimkhia halor ka jaka sumar ia kiba pang COVID-19.
La sngewthuh ba ka nongrim kaba la pynlong ia u MLA Nongpoh ba un bitar halor ka jingkular kai ka sorkar jylla, ka dei namar ba u la iohsngew ia ki jingkular da u myntri rangbah ka jylla, u Conrad K Sangma bad u Myntri ka tnad ka koit ka khiah, u Bah AL Hek, kila kular ba ka MCH Hospital ha Umran kin pynkyla noh shipor sha ka covid-19 hospital ba la buh por ruh ban pyndep ne pyntreikam noh tang hapoh ka 15 tank u jyllew, hynrei kat haduh kine ki sngi ruh kam pat urlong satia.
Phi don ban ong eiei?