Bitar shla ki nongkyrshan ka AGP, ba pyrshah ia ka jingtreilang bad ka BJP

Guwahati: Ka jing ia treilang ka BJP bad ka seng AGP, la iohi, kumba kam wan rah ia ka jinghun jong ki nongtrei jong ka seng AGP.

Mynta ka sngi, la iohi ia ki paidbah kiba ju don ryngkat bad ka seng AGP, ba ki la leit tur sha ka ophis jong katei ka seng kaba don ha Ambari, ha Guwahati bad ka daw ka long ban pynpaw ia ka jingsngew pyrshah jongki, ia katei ka jingiatrei lang jong kitei ki ar tylli ki seng sain pyrthei ha kane ka elekshon Lok Sabbha.

Kitei ki dkhot jong katei ka seng, ki la tur sha ophis jong ka AGP bad ki la pyrta pyrshah ia ki nongialam jong katei ka seng bad katei ka la pynlong ia ki pulit lem bad ki CRP, ba kin wan ban teh lakam ia katei ka jing ia kynad ha khmat ophis jong katei ka seng sain pyrthei.