Bitar ki Rangbah Shnong ba pynmih Aiñ Ar Maloi ka sorkar

Shillong, 29 Nailur:
Ka Executive Committee ka Synjuk K Nongsynshar Shnong ka Bri u Hynniewtrep kaba la shong jingialang ha ka 28 tarik u nailur, 2015 ka la pynrem jur ia ka jing wanrah u myntri rangbah ka jylla u Dr.Mukul Sangma ia ka Aiñ Ar maloi ki nongmihkhmat paidbah ha Ing dorbar Thaw-aiñ ka jylla lane ka Prevention of Disqualification (Members of the Legislative Assembly of Meghalaya) Amendment Bill, 2015 kaba khanglad ia ki MLA ban bat ha kajuh ka por ia ka kam MDC. Ki Rangbah Shnong ki la pynrem jur ruh ia kito kiba kyrshan ia u Dr.Mukul kiba la kyrshan tylli ia u wat hapdeng ka jingpyrshah kaba mih na ki liang pyrshah ba lada pyntrei kam ruh dei ban pyntrei kam naduh u 2019 lane ban phah sha ka Select Committee.
Ka kyrwoh na u General Secretary katei ka Synjuk u bah R.L Blah u la ong ba wat la u myntri rangbah u ong ba ka jingwanrah ia katei ka aiñ kam dei ba don kano kano ka jingthmu lane ka jingar jingmut pynban katei ka kyrwoh ka la ong balei ba ka sorkar ka kyrkieh palat ban pass ia katei ka bill? Lada ka sorkar ka lah ban pynjlan palat shisnem ia ka samoi treikam ki MDC ka GHADC balei kam lah ban ap haduh ba ka samoi treikam kine ki nongmih khmat ar maloi kan kut bad ban pyntreikam ia ka naduh 2019?, ong ka kyrwoh.
Katei ka kyrwoh ka ong ruh ba ka long kaba lyngngoh ba ia ka kam ar maloi la ia kren tang na ka bynta ki MLA ba long MDC, hynrei kam shym la don pat ka jingkhang lad ia kito kiba bat kam chairman, Parliamentary Secretaries bad kiwei ki kam kiba ki iohnong, hato ym dei ban thew lang ia ki ruh kumjuh, hato lah ban ngeit ba ka jingthmu ka sorkar ka dei na bynta ka jingbha ha baroh ki liang, ong ka kyrwoh.
Ki Rangbah shnong ki la pynpaw ruh ka jinglyngngoh ba ka sorkar ka lah ban pynjlan ia ka dorbar synrai tang ha ka khyndiat minit bad kata ruh ban ia kren tang na ka bynta ka ka mar maloi hynrei la bret noh shadien ia ki mat kiba dei ban ia kren na ka bynta ka iap ka im ka jaitbynriew.
Ka la pynrem ruh ia kito kiba kam ialade ki riew shemphang kiba kynthoh ia ka jingiakhih ki Rangbah Shnong tang na ka jingmyntoi jong ki shimet hi, khadduh ka kyrwoh ka la kyrpad ia u Lat ka jylla ba un peit bniah bha shuwa ban mynjur ia katei ka bill ar maloi ka sorkar namarba kan ktah ia ka jingiadei ka District Council bad ka sorkar jylla bad ka don jingiadei ruh ia ka jingpynneh pynsah ia ka riti dustur .