Bitar ki paidbah ba thurmur treikam ka MeECL-Pynursla

Shillong,23 Naiwieng:
Nalor ka jingshah pyndik namar ka jingbym biang ka bording ilektrik, mynta pat ki paidbah ka thaiñ Pynursla ki la shah pyndik sa ha ka bai thang ding bad katei ka dei namar ka jingtrei thur-mur palat ki nongtrei kiba don ha ophis jong ka MeECL ha Pynursla.
Kam dei tang ka sien kaba nyngkong hynrei ka dei ka jingjia kaba iai jia khah khah ha kaba ki paidbah kiba la dep ban siew ia ka bai thang ding jong ki ha u bnai ba la dep ruh la pan biang na ki mynta u bnai, ka bill ba ki paidbah ki ioh mynta u bnai ka pyni ba kim pat siew ia ka bill jong u bnai ba la dep bad la pyni ba ki hap ban siew ia katei ka bill ar bnai.
Tang mar ia poi bill light, ka la pynkyndit ia ki paidbah ka Pynursla Proper bad Pynursla Main Road ban iohi ba la thoh ba kim pat siew ia ka bill jong u bnai ba la dep kaba la thoh ha ka bill ‘Outstanding Bill-Including DPC’. Tang mar ia ioh ia katei ka bill ki paidbah ki la khih bitar ia ka tnad Revenue jong ka ophis ka MeECL , Pynursla naba ki la sma lypa ba katei ka dei ka kam thur-mur jong katei ka ophis naba kane ka la jia teng ruh ha ka shnong Neng-gate, Pynursla ha u bnai ba la dep.
Ha utei bnai ba la dep, la iathuh ha u nongthohkhubor ba ki paidbah ki la leit sha ophis ka meECL ban ia kren ia katei ka kam bad hadien ba la dep ia kren , ka ophis ka la kubur ia ka jingbakla jong ka bad la pynbeit ia katei ka kam bad la phah siew noh tang shibnai. Hynrei kane ka jingjai ka dang iai bteng bad katei ka pynsngewthuh ia u paidbah ba kane kam dei shuh kaei kaei hynrei ka dei ka jingbymler treikam jong ki nongtrei ka tnad Revenue katei ka ophis kiba kheiñ ia ki pisa pilaiñ.
Haba ia kren bad une u nongthohkhubor, ki paidbah ki la kyntu ia ki bor ba halor jong katei ka tnad ba lada ki nongtrei jong ka kim lah ban trei ia ka kam kumba la bynshet ha ki, dei ba nweng kam noh ia ki bad dei ban wanrah da ki briew kiba tbit. Katkum ka jingioh lum jingtip la ong ba bun na kitei ki bill ki dei kiba la siew online bad dei na katei ka daw ka pynartatien ia ki paidbah ioh lehse ki nongtrei katei ka tnad kim pat da tip bha ia katei ka rukom treikam kane ka juk mynta , bad dei na katei ka daw ki la dawa ban wanrah da ki briew kiba tbit khnang ba kan ym pyndik ia ki paidbah ka thaiñ.