Shillong: Mynta ka sngi, na ka liang ki nongtrei ka EMRI 108, kiba don hapoh ka lama jong ka Meghalaya EMRI Worker Union, ki la pynpaw ia ka jingbitar jong ki, ba hadien ba wat la ki la shah khot ban ia kren bad u Myntri ka tnad ka koit ka khiah u James PK Sangma, hynrei kim shem la ia kynduh ia u, namar ba um pat lah ban wan phai na Nongbah Delhi.
Dang ha ki khyndiat taiew ba la lah, na ka liang ki nongtrei emergency service, kiba don hapoh ka lama ka Meghalaya EMRI workers Union, ki la pynlong ia ka jingiakhih na ka bynta ban dawa na ka sorkar ban nym ai shuh ia ka GVK company ban peit ia ka EMRI, hynrei ban shimti bad ban peit hi noh da ka tnat jong ka koit ka khiah.
Mynta ka sngi ka 10 tarik kyllalyngkot 2022, na ka liang ki nongtrei ka EMRI ha ryngkat ka jingkyrshan bad synran lang ka seng HNYF, ki la leit ban ia kynduh ia u myntri ba dei peit iaka tnat ka koit ka khiah ha ka jylla u James PK Sangma ha ka ophis treikam ka jong u ha secretariat, hynrei ka la long leh noh ei, katei ka jing leit ka jong ki, ha kaba u myntri um shym la don ha ka ophis treikam jong u, namar ba u dang don shabar, kata ha nongbah delhi.
Haba kren sha ki lad pathai khubor, na ka liang u bah Joseph Pyngrope u Publicity Secretary, ka Meghalaya EMRI Workers union u la ong ba kane jing leit ia kynduh ia u myntri, ka dei hadien ba la dep shah khot na ka liang u Myntri ban ia kynduh ia ki mynta ka sngi, hynrei haba ki la wan ha ka por 4 baje janmiet, u myntri pat um shym la don ha ka ophis treikam ka jongu bad kane ka la pyn bitar shi katdei ia ka jing leh jong u myntri ka tnat ka koit khiah kaba paw shai ba um khein snep, ia kitei ki nongtrei jong ka EMRI bad ki la pynrem jur ia u.
iakat ki nongtrei shitom nabynta bapang bashitom naduh longkmie bakha khun,tymmen,samla,rangbah ,khynnah ,khunlung la ai ti met mynsiem daka jingshakri Mon sngewbha ki kynduh jingeh haduh kAtne ngi donkam ban ienglang ryngkat kawei khnang kin ioh laka hok bakidei ban ioh