Bitar ki nongialam shnong ia u President ka CoRP

Nongpoh: Hynnin ka sngi ki nongialam shnong ka thain Bhoirymbong ha ryngkat ki briew ka Market Committee, ki la leit ban jurip ia ka jaka kaba la thmu ban tei ia ka Traditional Market ha Bhoirymbong bad ha katei kitei ki riew rangbah ki la pynpaw ia ka jingbitar kaba khraw ia u Bah Bandary Ryntathiang, President ka Confederation of Ri Bhoi People (CoRP) bad uba dei ruh u Rangbah shnong ka Mawpun Lumkshiad, uba la pynthut halor ka jingiaid beit katei ka Iew Tynrai, da kaba u la ujor Mukotduma sha Iingkashari bad kaba la long kum ka jingpynthut ia katei ka Iew.

Kitei ki riew rangbah, kibala leit ha ka ban jurip ia katei ka jaka, ki kynthup ia u Bah S. Lamare, Chairman ka Shnong, u Bah Reading Rymbai, Secretary Shnong bad ka Market Committee bad u Bah Sainpyniar Mukhim bad kumjuh u Bah Banjop Maring, President ka KSU Eastern Border, ha kaba ki la pynpaw ia ka jingsngewsih kaba khraw halor katei ka jingwan pynthut da u Bah Bandary Ryntathiang, namar ka jingleit pynthud jong u halor ka tender ha ophis ka DRDA, ka la pyndkoh noh ia ka jingstet ban pyntrei ia katei ka Traditional Market.

Haba kren sha ki lad Pathaikhubor, kitei ki nongialam shnong bad market Committee, ki la ong ba naduh ka sngi kaba katei ka thain ka la ioh ia katei ka Traditional Market, ka jingkmen kam dei tang ia ki nongialam shnong, hynrei wat ki nongshong Iew ha Bhoirymbong ruh ki la kmen bad ki da kwah eh ba katei ka Iew kan pyntrei noh shaid shaid bad ban ioh pyndonkam noh, hynrei ka jingwan pynthud u Bah Bandary Ryntathiang, ka la pynbitar eh ym tang ia ki nongialam shnong bad Market Committee, hynrei wat ki nongshong Iew ha katei ka jaka ruh ki la bitar.

Ki la ong ruh, ba kum u riew rangbah u dei ban iohi ia ka jingeh kaba la iakynduh da ki paidbah halor ka jingkhapngiah ka Iew Bhoirymbong, ha kaba u la dei ban kyntu ia ka sorkar ba ka dei ban pynstet ha ka jingpyntrei noh ia katei ka Iew, hynrei katei ka jingleh jong u, ka la wanrah ia ka jingduhnong kaba khraw ia katei ka thain hi baroh kawei.

Lah ruh ban kdew hangne, ba katei ka jaka kaba la thmu ban tei ia katei ka Traditional Market, ka dei ka jaka kaba don ia ka jingheh kumba 5 Akar ei ei bad kaba don hajan ka Madan Kurkalang ha Bhoirymbong, ha kaba ki nongialam shnong bad ki Market Committee, ki kwah eh ban pynkloi noh ha ka ban pynstet ia katei ka Iew, khnang ba kan long ka jingmyntoi ia ki paidbah ha katei ka thain hi baroh kawei, namar katei ka thain ka dei kaba la longpdeng ha Ri Bhoi Mihngi.

Kitei ki riew rangbah, ki la kyntu ia ka sorkar ba kim dei ban pynsngap halor ka jingujor utei u Riew shimet, uba khlem don shuh kano kano ka jingpyrkhat, na bynta ka bha ka miat ha ka imlang sahlang bad khamtam eh, haba iadei bad ka jingsuk ki nongdie jingdie bad ki nongthied nongpet ha Iew Bhoirymbong.

Haba pyrshang ban kylli na kitei ki riew rangbah, ba ha kano ka nongrim, kaba la pynlong ia u Bah Bandary Ryntathiang, nongialam Sengbhalang bad nongialam shnong, ba un leit pynthut ia katei ka jaka, kitei ki riew rangbah ki la jubab ba kim tip na kano ka daw kaba la pynlong ia utei u rangbah ba un ujor Mukotduma sha Iingkashari, ha kaba wat na ka liang jong ki ruh ki sah ha ka umdum.