Shillong: Ki kmie ki kpa jong ki khynnah skul ki la kynnoh ba ka don ka jingleh thok bad ka jingbym biang ha ka rukom pyniaid ia ka jingiakob dro ha kane ka jylla kaba dei ka jingiakob ban jied ia ki khynnah na ka bynta ban leit ia shim bynta ha ka jingiakob dro ha ka ri India ne ka National Painting Competition 2018 kaba la pyniaid da ka Bureau of Energy Efficiency, New Delhi kaba hapoh ka tnad bording jong ka sorkar India. Katkum ka kyrwoh khubor na u Dr. Marc Nongmaithem uba na NEIGRHIMS uba mihkhmat ia ki kmie ki kpa u la ong ba ia katei ka jingiakob ha ka jylla ban jied khynnah nangne la pynlong ha ka 14 tarik u naiwieng ha NEEPCO, Shillong bad ki khynnah kiba jop nangtei kin ioh ban leit ia khun ha ka jingiakob dro ka ban long ha ka 14 tarik mynta u bnai ha New Delhi.
Ka kyrwoh ka la ong ba da ki sngi la dep ban ai lypa ia ka phang pdeng jong ka jingdro na ka bynta ki khynnah hynrei shuwa ban sdang ka jingiakob dro la pynkylla noh ia katei ka phang pdeng. Ka kyrwoh ka la ong biang ba la pan jingshai ha katei ka sngi ia kob na ki nongpyniaid jong ka NEEPCO Shillong bad ki la jubab da ka Email ba ka don ka jingbakla hynrei ki khlem leh eiei. Nangta ka kyrwoh ka la ong ba namar ba ka NEEPCO kam leh eiei la ujor sha u Secretary ka Bureau of Energy Efficiency, New Delhi ha ka 27 tarik u naiwieng hynrei wat hadien ba la ia kren da ka phone bunsien katei ka ophis ruh kam shym la leh eiei bad dei na kane ka daw ki kmie ki kpa ki kwah ban pyntip sha ki kotkhubor khnang ba kan ym ktah ia ka lawei jong ki khynnah skul.