Shillong:Ka kynhun jong ki nongtrei Congress ha Williamnagr, ki la mih myn hynnin ka sngi, ban pynpaw pyrshah, halor ka jing shah rem jong ka Deborah Marak bad kaba la ailad ban pynjop suk ia u kandidet jong ka seng NPP.
Ha ka jingialang, kaba la pynlong ha Congress Bavan ha Williamnagar, la dawa ba dei ban pynduh jait shi syndon ia kitei ki riew ialeh pyrshah seng bad ki da kdew kti ruh beit beit ia U Mukul Sangma, ba u donkti ha kaba pynrem ia ka Deborah Marak. Ka jingialang, ka dawa ruh ba dei ban pynshitom da kaba tyngeh ai U Mukul Sangma bad ki la don ruh ki samla, kiba dawa ba dei ban thang ia ka dur jong U Mukul bad katei ka la pynlong ia ki nongialam, ba la kham rangbah ba kin pynthanda ia katei ka jingkhie bitar jong ki samla.
“Naduh u myntri rangbah barim, ka khun jongu bad u pyrsa kurim jongu, U Daryl, ki la wan sha ka konstitwensi ban kyrshan ia u kandidet shimet U Sengbath Marak” ong ki dkhot jong ka Block Congress bad la iathuh ruh ba U Mukul bad ka khun jongu, ki don ha Rongsak, hynrei U Daryl, u don ha Nokil bad sha Williamnagar ban trei pyrshah ia ka Deborah Marak.
Ki nongtrei Congress na Ampati bad na Songsak, ba kynthup ia U Stevie Marak MDC, ki dei kiba bunkam bha ban kyrshan ia U Sengbath, ong ki nongialam Congress ka Williamnagar.
“Kum u nongialam jong ka kynhun ki MLA Congress U Mukul, ula dei ban sangeh shi syndon ka jingialeh pyrshah seng. Kumno kin shu don ki ban ialeh pyrshah ia u kandidet jong ka seng, khlem da ioh ia ka jingmynjur jong u nongialam rangbah” ong ka Deborah Marak bad ka iathuh ba ki don bun bah ki dkhot jong ka seng Congress, kiba kyrshan noh sha ka NPP, haba la ai jingmut ia ki, ban kyrshan ia U Sengbath Marak. Ka Deborah, ka pyni ruh ba ki vote jongka bad ki jong U Sengbath bad jong U Lahatson, uba ialeh pyrshah Congress, ki poi baroh sha ka 9,721 vote bad kumta, ka la dei ban jop da kaba suk, lada kam don ka jing ia pait jong ki kynhun Congress ha katei ka Constituency. Mynta ki nongialam katei ka seng, ki dawa ia ka AICC, ba kan pyni da ki kam, ia kitei ki riew ialeh pyrshah seng.