Bitar ki Daloi ia ka JHADC, ujor sha u myntri rangbah

Shillong,18 Nailar:
Ki Daloi ka ri Lum Jaintia ki la ujor sha u myntri rangbah ka jylla u Dr.Mukul Sangma pyrshah ia ka Jaintia Hills Autonomous District Council ( JHADC) kaba la hukum ia ki ba kim dei shuh ban lum khajna. Ki Daloi ki la phah da ka jingthoh mynta ka sngi sha u myntri rangbah bad ia katei ka jingthoh la soi da u bah Manbha Kyndoh Secretary jong ka Dorbar Ki Daloi ka Ri Jaintia.
Ha katei ka jingthoh ki 18 Daloi ki pynpaw ha u myntri rangbah ba ki dei ma ki kiba don ka jingkitkhlieh ban pynneh pynsah bad ban kyntiew ia ka kolshor bad ka riti ka dustur bad ki dei ruh ma ki khlieh jong ki Elaka bapher bapher ha Ri Lum Jaintia bad ki la kdew ba kim lah ban pyntyllun ia ki kam lada khlem pynmih pisa da kaba lum khajna na ki jingmih bapher bapher ha ki Elaka. Ki la pynkynmaw na ia katei ka dustur la ju leh naduh hyndai hynthai wat shuwa ka jingsynshar phareng bad ka bteng haduh mynta, ki la kdew ba ha ki snem 1700 AD ka la don ka thma hapdeng u Syiem Ahom bad u Syiem ka Jaintia namar ka jingbym sngewthuh jingmut ban ia sam ia ka khajna.
Kala pynkynmaw ruh ba dang shen ka ing bishar ba ha khliehduh ka Ri ka Supreme Court ka la ithuh ia ki bad ka la pynmih ia ka hukum ba ki lah ban bteng ia katei ka kam bad ban pyntreikam katkum ki kyndon jong ka District Council bad kaba la kren shai ha ka Para 5 jong ka Sanad kaba la pynkupbor ia ki Daloi ba kin bteng ia ki riti dustur bad ban lum khajna. Hynrei ki la ong ba ha kane ka sien kaba mynta ba synshar ka EC ka seng Congress ha JHADC la pynkylla khongpong bad la pynmih pynban ka hukum ba ki dei ban sangeh ka lum khajna. Ki la kynnoh ba katei ka jingleh ka EC ba ialam ka seng Congress ka thmu pynban ban pynduh pyndam ia ka riti ka dustur bad ka dei ka jingleh pyrshah Daloi.
Ki la kdew ba ka KHADC ka shah ia ki syiem ban lum khajna da ka jingthmu ba ka riti dustur kan iaineh. Ki Daloi ki la pynsngew sha u myntri rangbah ba kum u Khliehduh jong ka jylla bad u nongialam ba ha khlieh jong ka seng Congress ha ka jylla u dei ban tuklar ia katei ka jingleh ka EC ka seng Congress ha JHADC ba kam dei ban tuklar ia ki kam synshar khadar bad ki riti ki dustur.