Bitar ki Congress na Ri Bhoi, halor ka jingjia thombor ka Assam ha Iongkhuli

Nongpoh: Ka Ri Bhoi District Congress Committee (RBDCC), lyngba ka jingkren jong u Bah Mayrald Born Syiem, MLA Nongpoh bad uba dei ruh u President ka RBDCC, ki la pynrem jur halor ki kam leh donbor da ka sorkar Assam ha kito ki shnong khappud hapdeng ka Meghalaya bad Assam.

Haba kren sha ki lad pathai khubor, u Bah Mayrald Born Syiem, u la ong ba kaei kaba la leh da ka sorkar Assam, ka la pynpaw ba kam burom ei ei ruh eh halor kata ka jingiakren hapdeng ki Myntri Rangbah ka jylla Meghalaya bad Assam, kiba la iakren bad dei ban don kata ka jingia burom kaba markylliang haba iadei bad ki kam pynroi ha kito ki shnong kiba don ha khapud ka Meghalaya bad Assam.

Kum ka Party, ngi da sngewsih ban ioh sngew ba ki bor Pulit ka Assam, ki la leit ban jynrat naphang ia ki Post Ilektrik, kaba ka sorkar Meghalaya lyngba ka tnat sam bording, ki la thmu ban leit sam bording Ilektrik sha katei ka shnong, kaba dei ruh kawei na ki shnong khappud ha Ri Bhoi, kaba hap hapoh ka Raid Marwet bad Hima Mylliem.

Kum ka Party kaba peit ia ka bha ka miat bad ka roi ka par ki paidbah, ka sngewkhia eh halor katei jingjia, namar da ha kine ki shisngi ar-sngi la don kata ka jingiakren hapdeng ki Myntri Rangbah ka Meghalaya bad Assam, kiba la iakren ruh ba ym dei ban jia ki kam ia huri hura ha ki khappud, hynrei mynta pat la sakhi ia katei ka jingjia kaba sngewsih eh bad kaba kum ki paidbah ha ka jylla kim lah ban pdiang da lei lei ruh em, bynrap u Bah Mayrald born Syiem.

Namarkata, kum ka Party kaba peit na bynta ka bha ka miat ki paidbah bad khamtam eh ia kito kiba sah ha khappud, na ka bynta ban tip ia ki jingshisha baroh, ngin sa leit sha katei ka shnong ban iakren ia ki nongialam shnong bad riew paidbah, khnang ba ngin tip ia ki jingshisha baroh bad halor kata, ngin sa iasaid ruh de sha ka sorkar jylla, u la bynrap.