Bitar ka Seng Samla Tyrso Pyllun, ba thut palat ki Network

Nongpoh:Ka Seng Samla Tyrso Pyllun (SSTP), ki la pynpaw ia ka jing bitar eh halor ka jing thut palat ka Network Jio bad Airtel, ha ka thain Tyrso hi baroh kawei bad kaba la pyn jynjar eh ia ki paidbah kiba shong ba sah ha katei ka thain.

Ha ka kyrwoh kaba la phah da u samla Pynsuk Sten bad samla Player Mashli, kiba dei ki nongialam ka SSTP, ki la ong ka jingthut ka Network ha katei ka thain, ka la ktah shikat dei eh ia ki paidbah ha ki 12 tylli ki shnong kiba don ha katei ka thain Tyrso, khamtam ha kaba kum kane ka por ba baroh ki briew ki donkam ia ka Network kaba biang, na ka bynta ban trei ia ki kam bapher bapher.

Haba iadei bad katei ka jingthut palat ka Network ha katei ka thain, na ka liang ki nongialam ka SSTP, ki la pynpaw ia ka jingbitar bad ha kajuh ruh ka por, ki la pan jingpynshai na ka Kompani Airtel bad Jio, ba balei kim lah ban pynbiang ia ka Network kaba paka ha katei ka thain.
Ka kyrwoh na kitei ki nongialam ka SSTP, la ong ba don ki khep ba ka jingjah Network ha katei ka thain ka long da ki taiew bad kaba la ktah eh ia ki paidbah, namar tang ka bai recharge ruh ka la dep da ki spah spah tyngka, hynrei ia ka Network pat kim ioh ia kaba biang, kaba la pynsuba ruh ia ki nongialam ka SSTP, ba kitei ki Kompani ki la shu wanleh Bussiness ha katei ka thain, hynrei khlem pyrkhat pat ia ka jingdonkam ki paidbah.

Kumta na ka liang ka SSTP, ka dawa ia ka Kompani Jio bad Airtel, ba ki dei ban pynbiang mardor noh ia ka network ha katei ka thain, khnang ba kan pynsuk ia ki paidbah. Ha kajuh ruh ka por ka SSTP ki suba sniew ba lah ban don ka jingiatreilang hapdeng ka Airtel bad Jio, namar ha ka por ba jah ka Airtel don ka Jio bad ha ka por ba jah ka Network Jio don ka Airtel.

Haba iadei bad katei ka jingbymbiang Network, na ka liang ka SSTP, ka aipor 1 taiew ia kitei ki kompani ba ki dei ban pynbiang ia ka Network bad lada kim lah ban pynbiang, na ka liang jong ki, kin sa shim da kiwei pat ki sienjam kiba kham tyngeh pyrshah ia kitei ki kompani kiba wan buh Tower ha katei ka thain, hynrei khlem da pynbiang pat ia ka network.