Bitar ka RBYF, ba lip ding khah khah ha Ri Bhoi Sepngi

Nongpoh:Ka jinglip bording kaba khah khah ha ka thain Ri Bhoi Sepngi, ka la pynbitar eh ia ki paidbah kiba sah ha kiba bun tylli ki shnong kiba don ha katei ka thain, namar shisien ba la hap slap, kumta ka bording ruh ka la duh beit bad kaba shimpor bun bun kynta bad teng da ki sngi ba ka bording kan wan biang.

Halor katei ka jinglip bording kaba khah khah, u Bah Rao Nongtri, Publicity Secretary ka RBYF, Western Zone, u la ong ba ka jingthut ka bording ha katei ka thain ka la long shaba palat pud bad kaba la pynsyrtok shikatdei eh ia ki paidbah ha katei ka thain.

U Bah Rao Nongtri, u la ong ruh ba ka jingthut ka bording, ym ba kan pynjynjar tang ia ki paidbah, hynrei ka jingjynjar kaba kham palat, ka dei ia ki khynnah skul bad kiba donkam ban leh ia ki online klas.
Namarkata, na ka liang utei u nongialam ka RBYF na katei ka thain, u la kyntu ia ki briew kiba deipeit ia ka kam bording ha katei ka thain, ba ki dei ban shimkhia ha ka ban pynbiang ia ka bording ha katei ka thain, khnang ba kan long ka jingsuk ia ki paidbah nongpyndonkam bording bad khamtam eh ia ki khynnah pule.