Bitar ka Pillangkata, Maikhuli, halor ka nongrim pynbeit pud ki ar jylla

Nongpoh:Dang mynsngi Saitjain ba ki heh pynbeit pud na Megha laya bad Assam, ki la leit ban jurip ia ki shnong khappud ka thain Pillangkata bad Maikhuli, hynrei myn hynnin ka sngi ki riew paidbah na katei ka shnong, ki la iamih paidbah ban pyrshah ia katei ka rukom pynbeit pud, da kaba kynnoh ba ka dei ka kam pynbeit pud ka bym don nongrim, namar ka Assam ka la shu kam wat ia ki jaka kiba dang hap pura hapoh ka jylla Meghalaya.

Ban pyrshah ia katei ka rukom pynbeit pud, kitei ki briew na ka Jaitbynriew Garo, ha ryngkat ka jingdonlang ki dkhot ka Garo Student Union, ki la pynlong ia ka jingialang ha shnong Maikhuli, ha kaba lyngba katei ka jingialang, ki la pynpaw ba ki sngewpyrshah eh ia katei ka rukom pynbeit pud, da kaba kynnoh ba ka dei ka jingpynbeit pud kaba ym don jingmyntoi, namar ki la don bun ki jaka ha katei ka thain, kim sa shah klun ei noh ha ka Assam.

Ki nongialam na ka jaitbynriew Garo, kiba kynthup ia u Sunmoon Marak, President ka GSU, ka Rikomuni Marak, ki la ong ba lada ka long ha kano kano ka rukom, kin pyrshah beit lada kitei ki jaka ba ki shong ki sah kin leit sha Assam, namar katkum ka jingsngewthuh jong ki, la pynpaw ba kane ka jingpynbeit kaba mynta ka pynlong ba wat kito ki jaka ba ym don don ha ka thuh iaknieh pud, hynrei ha kane ka jingwan jurip da ki heh ka Meghalaya bad Assam, kiba kum kitei ki jaka ki la shah kynthup sha Assam.