Shillong, 17 Nailur:
Ka jingbym poi ki nongtrei sorkar ha Secretariat bad ha Additional secretariat namar ka pakhang ophis ki sengbhalang ka la pynbitar bad pynkyndit ia ka myntri ba peit ia ka Secretariat Administration ka Deborah Ch Marak , kaba ong ba kan sa phah ia ka kaiphod sha u Myntri Rangbah halor kane.
Ka Deborah Marak kaba la pynlong ia ka jingjngoh kyndit ia ki kamra ha Secretariat bad ha Additional secretariat ban peit ia ka rejister ki nongtrei hynne ka sngi, ka la pynpaw ba kam sngew hun ban iohi ba ki nongtrei kim shym la wan trei.
“Baroh ki la kiar ia kane bad ngam khmih lynti ba ka ophis kan thylli” la ong ka Debora bad bynrap ba ka dang pan kaiphod ban aiti pat sha u Myntri Rangbah.
Haba pynpaw ia ka jingsngew pisa ia ka jingkhot pakhang ophis jong ki sengbhalang kaba la ktah jur ia kine ki ar tylli ki ophis ba heh duh ha ka jylla, ka myntri ka la ong ba ka jingbym wan ki nongtrei ka long kaba sngewsih bad kaba pynduh jingkyrmen.
“Ka Secretariat ka dei ka u dohnud jong ka nongbah bad nga kyrmen ba ym don mano mano ba pynwit ia ki ban wan trei ” ka la ong.
Kane ka jingong jong ka myntri ka la long hadien ba baroh ki ophis sorkar ki la shah ktah jur na ka pakhang ophis jong ki sengbhalang kiba dawa ba dei ban pynurlong noh ia ka Inner Line Permit (ILP).
Kumba ju long ki nongtrei sorkar kim ju sngap ia ka jingbthah ka sorkar ban wan sha ophis bad ki kiar ban wan sha ophis tang namar ka pakhang ophis jong ki sengbhalang, la ong ka myntri.
Ha ka jingleit jngoh jongka ia ki kamra ha Secretariat ka la lap ba don tang khyndiat eh kiba wan trei bad ka Secretariat kaba ju bunkam bha, hynne ka la kynjah jar.
Ha kajuh ka por halor kane ka jingkynjah ka Secretariat, u Principal Secretary (Home) u KS Kropha u la ong ba ka sorkar kan hap ban pyrkhat da kumwei pat ia kane ka jingpep ki nongtrei ha kum kane ka jingiakhih bad ka tnad Personnel department ka dei ban peit ia kane.
Katkum ka jingong u Kropha, ka jingwan trei ha Secretariat bad ha man ki Directorate ka iapher bad ka long kumba sanphew percent haba khein kyllum.
Ka pakhang ophis jong ki sengbhalang ka la ktah jur ha kaba baroh ki jaka treikam kum ki bank, ki ophis ki la khan glut hynne.
Hynrei ha kajuh ka por, u la iathuh ba ka sorkar pdeng ka la pynpaw ba kam pat lah ban phah pulit sha ka jylla ha kane ka por.
Katkum ka jingong u Kropha, ka sorkar pdeng ka la ong ba ka dang pyntreikam ia ki pulit sha kiwei ki jylla, bad kan pyrshang katba lah ban phah sha Meghalaya tang shu lait. “Ngin kyrpad beit ia ka sorkar pdeng ban phah bor pahara sha jylla”,u la ong.
Phi don ban ong eiei?