Bitar ka kur Thangkhiew

Shillong, 23 Naitung:
Ka Dorbar Kur Thangkhiew ka la byr ngem ban ujor sha ki bor ka ain ia uwei u dkhot ba rangbah na ka kur jong ka u Asirshon Thangkhiew ha kaba la kynnoh ba u la pynkhyllem be-ain ia ki dieng na ka khlaw kur kaba la tip kum ka Wah Pomdngiem khlem ka jingtip ka kur Thang khiew.
Haba kren sha ki nongthohkhubor mynta ka sngi u President katei ka seng Kur Thangkhiew u bah Livingstone Thangkhiew u la ong ba katei ka kur kan leit ban ujor sha ki bor ka ain, namar katei ka jingpynkhyllem be-ain ia ki dieng na ka khlaw kur.
U la iathuh ruh ba u Asirshon uwei na ki rangbah kur jong ka kur Thangkhiew uba shah beh noh na ka seng kur, namar ka jingleh donbor jong u khlem ka jingtip ka kur ia kiba bunbah ki kam kynthup ka jingbym shai ka jingkhein jingdiah halor ka bai lut ksan ba ka NEHU ka la siew sha katei ka kur ha u snem 1997, u la pyntip ba la beh na ka seng kur ia u ha u snem 2001.
 U bah Living u la ong ba nalor ba la shah beh seng ruh u Asirshon u dang bteng ban pynkhyllem ia ki dieng ki siej na ka khlaw kur ha kaba u la die da ki lak ki lak tyngka bad u la kam ruh ba ka tnad khlaw ka sorkar jylla ka la ai jingbit ia u ban pom ia ki dieng na katei ka khlaw. U la ong ba katei ka khlaw kaba heh 25 akar ka dei ka khlaw kaba ri ba sumar da ka seng kur Thangkhiew.
Utei u President ka seng kur Thangkhiew u la pyntip ba ka dorbar kur ka dang ap ia ka ripod na ka tnad Forest Range jong ka ophis u DFO ha kaba iadei bad katei ka kam. U la ong biang ba ka kur Thangkhiew ka la pynbna sha ki paidbah baroh ba kin kiar ia ka jingiatyrwa ia die ia thied khyndew ha Wah Pomdngiem lyngba u bah Asirshon Thangkhiew bad ka kynhun jong u.