Bitar ka kur ‘Chyne’ bad ‘Dkhar’ ba pynkam jait Khasi U Acting Secretary ia u bar jylla

Shillong, 11 Nohprah:
Ka kur Chyne bad ka kur Dkhar ka la bitar jur ia u Acting Secretary ka Dorbar Shnong Shella u bah B.Ora, ha kaba ki rangbah kiba la mih khmat ia kitei ki kur ki la kynnoh ba u bah Ora u la ai sertiphiket ban pyn shisha ba u Bidesh Dkhar u dei na ka kur Dkhar bad u kpa jong u pat u dei na ka kur Chyne, bad ki la ong ba ha ka sertiphiket u la thoh ba u Bidesh u dei u nongshong shnong ba pura ka Pyrkan, Shella, u dei u briew ba ia ithuh ithaw bha bad u bad u dei ruh u briew uba bha.
Ki rangbah kiba la mih khmat ia ka kur Chyne ki dei u Omesty chyne, Jasir,Shella bad u bah Sainkupar Chyne, Pyrkan, Shella katba na ka kur Dkhar pat la mih khmat da u bah E.W Dkhar na ka shnong Nongwar.Kitei ki rangbah ki la ujor ia katei ka kam sha u Executive Member ka KHADC uba bat ia ka tnad Elaka u bah K.P Pangniang bad ki la ai kopi lang sha u CEM, u MDC jong ki uba dei ruh u Deputy CEM bad kumjuh ruh sha u EM ka tnad khaii pateng.
Ha ka jingujor ki la pyntip ba ki la ioh jingtip lyngba ka ain wad jingtip kaba ki la ioh na ka ophis u SDO ( Civil) Sohra Sub Division ba u Bidesh Dkhar uba shong basah ha Pyrkan Shella , u la ioh ia ka EPIC bad u la long u nongthep vote hapoh Shella Konstitwensi, ki la kynnoh ba u la kam bad ai ia ka jait kpa jong u na ka kur Chyne kum u (L) P.Chyne, katba ialade pat u kam ba u dei na ka kur Dkhar kaba kitei ki ar-kur ki pyrshah jur bad ki kyntait ia katei ka jingkam u Bidesh.
Ki la pyntip sha u EM ba ki tip shai bad ki da thikna ba utei u Bidesh Dkhar um dei satia u trai shnong ka Shella bad um dei ruh na ka jaitbynriew Khasi-Jaintia, bad u kpa jong u ruh um dei na ka kur Chyne bad um dei hi ruh u Khasi, hynrei u la shu kam jubor. Ki la kynnoh ba ia katei ka jingkam kur Khasi u Bidesh pat la pynshisha da u Acting Secretary ka Dorbar shnong Shella u bah B.Ora, ha kaba ki la ujor pyrshah ia u ruh sha u EM ka KHADC.