Shillong: Ka KSU CEC lem bad ka North Khasi Hills District Unit myn hynnin ka sngi ka la ia kynduh bad ki kynhun Ultra Societies kiba thmu ban pyniaid ia ka Pool Party ha Umbir, Ri Bhoi district ha ophis treikam ka seng. Ha kane ka jingialang ka KSU ka khang ia kane ka kynhun ban pyniaid ia katei ka tamasa ha ka 11 tarik u Jymmang 2019 ha kaba kitei ki kynhun ki la kohnguh. Ka nongrim halor ba ka seng ka khang ia katei ka jait tamasa ka long halor ka rukom pynlong bad pynwandur ia katei ka tamasa kaba ktah ia ka akor ka burom bad ka ijot ki khun samla ka Bri U Hynñiewtrep, namar ha katei ka party, la kyntu ia ki nongiashim bynta ba kin ym phong jain, hynrei lait tang ki riam ba iada ia ki dkhot met ba kyrpang ha ryngkat ka dih ka bam. Ka seng ka kyntu, ba lada ki kwah haduh katta ki lah ban leh tang para ma ki khlem da ia wer paidbah.
Ia kum kine ki jait jingleh sngewbha kata ka pool party kaba ki ong ba la pyniaid da ka ultra societies ym dei ban shah satia bad dei ban khnang shi syndon namar kane kan wan lam ia ki khun samla jong ngi sha ka jingjot bad sa kawei ruh ki lah ban ngop ha ki jingdih ba pher ba pher. Te la kyrpad ia ka dorbar shnong ruh ba ka dei ban khnang bad ym dei ban ai lad ia kum kine ki jingleh sngewbha.
Yn ia ong shuh kumno, haba ka juk jong U Adam bad Ka Im, imat kumba ka la sdang ban wan phai biang..