Bitar ka JSU, ba ot tulop ia ki 108, buh por ban buria hapoh shitaiew

Shillong: Ka Jaintia Students’ Union ka buh por shi taiew ia ka GVK Emri, ba kan siew ia ka tulop, kaba ka la ot na ki nongtrei jongka.

Katei ka seng, ka pynpaw ruh ba kam lah ban pdiang ia ka jingleh donbor ba lah palat da ka company GVK ia ki nongtrei jong ka 108 da kaba shim noh ia ka hok kamai jong ki wad hapdeng ka jingeh kaba kine ki nongtrei ki mat.Ka seng ka dawa ruh na u myntri ka tnat ka koit ka khiah Bah Alexander L Hek ba u lah dei ban tuklar hi noh ia kane ka jingeh jong kine ki nongtrei 108 bad um dei shuh ban pynsngap ia ka daw kaba ai da ka GVK bad lada dei ban weng noh ia kane ka kompeni nangne ka jylla.

Ka seng JSU lyngba u kyrwoh ka seng u President ka Shillong Circle u Treiborlang R suchen, u lah ong ba lah ioh jingtip ruh ha ka por ba ki nongtrei 108 jong ka Assam ki iakhih pyrshah ia ka GVK hangtei ha jylla Assam ym shym lah don kata ka jingot iaka tulop na ki nongtrei bad hangne ha jylla Meghalaya ka long pynban da kaba khongpong.

Ka seng ka dawa ruh na ka sorkar ba kam dei shuh ban pynslem ban ai ia ka report ba lah dep ia tai ha ka special committee kaba lah dep ia shong ha ka 26 tarik jong u bnai July hapoh ka ophis DHS.

Ka JSU ka dawa ruh na ka GVK ba ka dei ban pyllait lut mardor hapoh shi taiew ia ka tulop ba lah dep ot na ki nongtrei108 bad lada kam lah ban pyllait ia kane ka tulop ba lah dep ot ka seng kam banse ban tuklar hi noh da lade ban iarap ia ki nongtrei ka 108 kiba lah shah iuh roit ia ka hok kamai ka jong ki. U samla Treiborlang R Suchen u lah ong ruh bun ki samla ki duh jingkyrmen ban ioh kam ioh jam ha ka juk mynta bad kane ka jing leh jong ka GVK ka pynduh jingkyrmen arshah ia ki samla ban wad kam ha kane ka juk mynta bad kane ka ialam kylla ia ki samla sha ka lynti jingbakla ha ka jingim ka jong ki.

Ka jingleh ka GVK ban ot tulop bad transfer khah khah ia ki nongtrei khlem da buh por ka lah paw shai lypa ba kadei ka jingiuh roit ia ka hok ki nongtrei ban biang ialadae (Exploitation of labour), kumta ka seng ka lah dawa na ka tnat labour ka sorkar ba ka dei ban leh eiei ia kane jingshah iuh roit ki nongtrei jong ka 108.