Bitar ka HNLC ia ka tnad pulit

Shillong,5 Nailur:
Ha kaba ia dei bad ka jingkynthoh ki pulit ha ki katto katne ki lad khubor, ha kaba ia dei bad ka jingkwah ia kren ia suk ka HNLC bad ka sorkar, ka HNLC ha ka kyrwoh ka la bitar halor kitei ki jingmih khubor kiba ki pulit ki la pynpaw ba kim sngew tynnad ia katei ka jingkwah kren ia suk, namar ba ka dei ka seng kaba la troin bad ki kwah ba ym dei ban khot ia kren shuh ia. Ka Kyrwoh lyngba u bah Sainkupar Nongtraw, Publicity Secretary ka HNLC ka la buh jingkylli da kaba ong ’kaei kaba ka tnad pulit ka khmih lynti ba ngin leh? Hato ki kwah ia ngi ban ia umsnam khnang bay n khot ia kren noh?’ ong ka kyrwoh. Ka HNLC ka la ong ruh ba ka don ka jingshaniah ha ka sorkar bad ka kwah ban wan shakhmat ban ia kren, hynrei ka la bitar pat ia ka tnad pulit namarba ka la buh jingkynthoh bad ka la ong ha ka kyrwoh aiu ki pulit ki don hok ban tuklar ia katei ka kam.
Halor ka jingpynkhreh ban wan sha ka miej jong ka jingiakren ka HNLC ka la ong ba ia katei ka jingthmu ban ia kren ia suk dei ka rai kaba ka seng ka la shim da ka jingiasngewthuh jingmut lang baroh, bad la shim ia ka rai ruh katkum ka riti jong ka HNLC.