Bitar ka HNLC ba kem ki pulit ia ka para u dkhot jong ka Seng

Shillong, 6 Lber:
Hadien shisngi ba la kem ia ki ar ngut ki briew kiba ki pulit ki la kam ba ki dei ki nongleit sam shithi dawa pisa jong ka HNLC kata u Vincent Khyriem bad u Wanker lang Rynjah, ki pulit ki la kem sa ia kawei pat ka kynthei kaba la tip kyrteng kum ka kong Wandalin Diengdoh kaba sah ha Lower Mawprem da kaba kynnoh ba ka dei ka nongiarap jong ka HNLC. Katei ka longkmie ka dei kaba shi para trai bad u dkhot jong ka seng HNLC u Phrangkupar Diengdoh uba la ju tip kum u Hep Metal.
Ka HNLC ka la bitar ia katei ka jingkem ki pulit ia ka para jong u dkhot jong ka bad ha ka kyrwoh khubor ba la pyllait paidbah mynta ka sngi ka la ong ba katei ka jingleh ki pulit ka dei ka jingnion bein ia ki ba ha iing hasem jong ki dkhot jong ka, ka la ong ba kiba haing hasem ki don ia ka hok ban ia kren bad la ki jong kiba haing jong ki lyngba ka phone ne da kano kano ka lynti bad kumjuh ruh ka kong Wandalin ka don ia ka hok ban ia kren bad u hynmen jong ka uba dei ruh u Asst. Defence Secretary ka HNLC.
Ka HNLC ka la pynrem jur ia katei ka jingleh ki pulit bad ka ong ba ha jaka ba kipulit kin kem ia ki riewsaiñ pyrthei kiba donkti bad ki lehnoh ki kem pynban ia kiba haing hasem jong ki lehnoh, katei ka seng ka la kdew ruh ha ka kyrwoh khubor ia ka Deborah Marak myntri sorkar ba ka dei ka nongiarap jong ka GNLA bad ka la ong ba baroh ki sengbhalang ha ri Lum Garo ki la kren ia katei ka ishu hynrei ki pulit ki leh kumba set kyllut. Katei ka seng ka la ong ruh ba katei ka jingleh ki pulit ka dei ka jingpynshit pynban, na ka bynta ki jingiaumsnam.