Bitar ka CSWO ba kyrshan tih dewiong ka sorkar

Shillong, 31 Nailar:
Ka President ka CSWO ka Kong Agnes Kharshiing ka la pyrshah jur ia ka jingpynmih jingpynbna (advertisement) ka sorkar ia ka jingialang jong u Myntri rangbah u Dr Mukul Sangma bad ki malik dewiong, ki MLA, MDC bad ki kynhun ban iakren halor ka jingkhang tih dewiong ka NGT ha ka 29 tarik Nailar ha U Soso Tham Auditium.
Ka CSWO ha ka kyrwoh, ka la ong balei ka sorkar ka pynmih da ka jingpynbna ia kane ka jingialang katba ia kiwei ki jingialang kam ju leh kumta.
Kane ka dei tang ka jingpynonkam bakla ia ka pisa paidbah namar ba ka jingkhot pynbna ban don ka jingialang bad ki nong khaii dewiong kiba pynjot ia ka mariang kam long kaba shongnia.Bun ki jingialang kiba donkam bad ki paidbah ka sorkar kam ju pynmih jingpynbna bad wat ia ki lad pathai khubor la shu shah tang ban shon dur.
Ka sorkar kam dei ban pynmih jingpynbna ia ka jingialang ban kyrshan ia ka jingleh beain jong ka jingtih dewiong kaba la ktah ia ki kynja baim baroh, pynjot ia ki khlaw ki btap, ka mariang.
“Ka jingbym lah ka sorkar ban pynieng ia ka ain ka la pynlong ia ka NGT ban wan tuklar, bad ban pynhun ia ki nongkhaii dewiong, ka sorkar kam map satia wat ban pyrkhat lem ia ki paidbah ba duk”, la ong ka CSWO.
Ha jaka ban kyrshan ia ki nongkhaii dewiong, ka sorkar ka dei ban thaw ia ki lad ki lynti ban iarap ia ki briew kiba shah ktah na ka jingkhang ka NGT ban aid a ki skhim jingiarap ym ban kyrshan ban tih dewiong kaba pynjot ia ka mariang.