Bitar ka CSWO ba ioh jamin u OC ka Mawryngkneng

Shillong,
05 Kyllalyngkot:
Ka President ka Civil Society Women Organisation (GSWO) ka bitar halor ka jinglait jamin noh jong u Officer -in- Charge (OC) jongka Mawryngkneng u Ekwin Pala uba kynnoh donkti ban lute na ka trok AS 01 EC 0515 myn ha ka 7 tarik jong u Naiwieng jong u snem ba la dep kaba la kit ia ki mar ruh haduh T. 20.10 lak.
Ka CSWO ka la buh jingkylli ia ka tnad pulit balei kam lah ban pynshit om katkum ka ain ia ki lai ngut ki pulit kynthup u OC bad ki nongbud jong u kata ia u Claipson M Marai uba dei u UB Constable bad Basan Lama uba dei u MPRO Operator.
Ia ki pulit kiba leh ia ki kam bymman ka ain ka suki bha ban treikam hynrei ia kiba rit pat ka kloi bha ban treikam, ong ka CSWO. Katei ka seng ka la kynnoh ba kane ka dei kaei kaba la jia ha ka jylla Meghalaya haba leh kiba don jingiadei bad kiba heh ba hain te ka shim por ban pynbna paidbah da ki pulit hynrei lada jia ia u thap u dap te tang mar syn ioh kem la pynbna paidbah lyngba ki tnad pathai khubor.
Halor kane ka CSWO ka dawa ba ki bor pulit, ki nongiasaid ain jong ka sorkar ki dei ban sangeh mardor namar ki paidbah ki la sdang duh ka jingshaniah ha ki namar ki bor ki la shah thied ha ki riew sain pyrthei bad kita ki heh sorkar, la kynnoh ka kong Agnes.