Bitar ka CSWO, ba iaid bus tang khyndiat ha ka nongbah

Shillong, 6 Nailar:
Ka CSWO ka la bitar ia ka jingduna ki bus sorkar kiba kamai ha ka nongbah ha kane ka sngi khot pakhang shnong ka seng ki trai bad malik dewiong.
Ha ka kyrwoh ba la pynlait, ka CSWO ka la ong ba ka iohi ba ki bus kiba kamai hynne ka sngi pakhang shnong ki duna bha. Ha ka jingshisha, ia kine ki bus la aiwai sha ki kontraktor na ka bynta ban pyniaid ban kit ia ki nongleit nongwan ha ka nongbah hynrei balei ki shong sngi ha kum kane ka sngi khamtam haba ka sorkar ka la dep pynbna ba dei ban mih paidbah ban nym kyrshan ia ka pakhang shnong, la ong ka president ka CSWO ka Kong Agnes Kharshiing.
Ka seng ka la ong ba ka sorkar ka dei ban pan jingshai na ki nongpynaid ia kine ki bus sorkar kiba la aiti ha ki riew shimet balei kim iaid bun ha kane ka sngi ban kit ia ki paidbah nongleit nongwan.
Ha kawei ka liang, ka CSWO ka la dawa na ka sorkar ba ka dei ban tohkit ia ka jingkynno bamsap ia ka skhim shna painkhana ha Garo Hills bad ym dei ban shu ia sei ia ki thma ktien.
Bun bah ka pisa sorkar jong u paidbah, la bamsap bampong hynrei khlem leh eiei t haba la ujor tang namar ba don kti ki politishian, ki ophisar, la ong ka CSWO. Ka ain ka dei ban long kaba iaryngkat ia baroh uba heh ne uba rit. Ka seng ka dawa ba dei ban pynshitom ia kiba donkti ban bamsap ia ka pisa ba la mang ban shna painkhana ha katei ka thain namar ba kane ka dei pyrshah ia ka riti synshar ka ri, la bynrap ka kyrwoh na ka president ka CSWO.