Jowai:Ka jingpynkiew dor ia ka Petrol bad Diesel ka la pynlong ia ka Jaintia Cement and Clinker Transporters’ Association (JCCTA) ban sngewbitar namar ka jingduhnong ha ka kit ka bah ban pynpoi ia ki mar ki mata kylleng ka jylla bad wat sha kiwei pat ki jylla lada kut noh ka lockdown.
“Kumba long mynta ka dor jong ka Diesel ka long T. 67.45 tyngka shi litar katba ka petrol pat ka long T.74 tyngka shi litar. Kane ka jingkiew dor ka umphniang kali ha kane ka jylla ka long na ka daw ba ka sorkar jylla ka la pynkiew ia ka khajna jong ka Added Value Tax”, la pynpaw u ma Balen Thubru, President ka JCCTA lyngba u kyrwoh khubor.
“Ngi kum ki trai trok kiba pynpoi ia ki mar ki mata kylleng ka jylla bad sha bar jylla ngi don hapdeng ka jingduhnong kaba khraw namar kane ka jingkiew dor ka umphniang kali”, u la bynrap.
Utei u nongialam ka JCCTA u la kynthoh ia kane ka sorkar ka bym shym la pyrkhat satia ia ka iap ka im ki trai trok.
U la iathuh ba ka sorkar ka la dep ban buh ia ka dor bai kali haba shallan ia ki cement bad clinker hapoh jylla bad shabar ruh katkum ka Notification jong ka tnad Transport hynrei ki company dewbilat bapher bapher kiba don ha East Jaintia Hills kila pynkhein bad khlem da burom satia ia kane ka hukum jong ka sorkar jylla.
Katkum ka dor jong ka sorkar lyngba ka Notification kaba naduh u August 2018, ki Company Cement ki dei ban siew ia ka bai kali kaba shongdor T. 0.70p ha ka shiton na ka bynta shi kilometer.
“Hynrei kitei ki Company ki la kyntait ban burom bad ban pyntreikam ia katei ka hukum ka sorkar”, la ong u ma Thubru.
Ka JCCTA ka la dawa ba ka sorkar ka dei ban pynhiar dor ia ka umphniang ban im lang u paidbah bad ki trai trok bad ban hukum tyngeh ia kitei ki Company ba kin pyntreikam noh ia katei ka dor ba la buh da ka tnad Transport.
Phi don ban ong eiei?