Bitar jur ki longkmie UDP Mawlai, ba khein nongshong wai u MLA

Shillong, 13 Risaw:
Ha ka jingjia ban pynkyndit ia u MLA ka Mawlai bad ka seng UDP, ki longkmie ka UDP women’s wing ka Mawlai circle ki la risain noh na ka party.
Ki nongialam seng longkmie ka UDP Mawlai circle ki la risain halor ka nongrim ba u MLA u Bah Embhahlang Syiemlieh u la khein ia ki nongtrei ka party kum ki nongshongwai.
“U MLA u la pynbynta ia ki nongtrei ka party kum ki nongshongwai kiba wan ban pynkhlain ia ka party” la ong ki longkmie ka UDP.
“Ka kamram jong u nhongialam kam dei ban kam ba u dei trai ia ka party hynrei u dei ban sngewthuh ba u la shah jied ban shakri ia ki paidbah” la ong ki longkmie ka UDP.
Ka UDP women’s wing ka Mawlai circle ka la ong ba ka jingong jong u Bah Embhahlang ka pyni ba u dei u nongialam bym kitkhlieh bad ha jaka ban pynthanda ia ka jinglong jingman hapoh ka party u la aiding pynban.
“U la wad daw pynban ha jaka ban pynjem ia ka” la ong ki longkmie UDP Mawlai. Da kaba bitar jur ia ka jingkam jong u MLA ba u dei u trai ka party katba kiwei ki dei ki tang ki nongshongwai, ki longkmie ka UDP ki la kynthah ia u MLA da kaba kynnoh ba u dei tang uba wan shong kurim ia ka UDP uba dei na ka KHNAM ha u 2009.
Ki nongialam ka UDP Women Wing Mawlai circle kiba risain ki long Kong M Kharkamni, president, Kong R Marwein, Senior vice-president, kong B Lyngdoh, vice-president, kong RL Tham, general secretary, kong
U Rumnong, chief organiser, kong B Marbaniang, sports secretary, kong R Kharpran, assistant sports secretary bad ka Kong B Nongkynrih.
Lah ban kdew ba katto katne ki nongialam jong ka UDP ki la risain na ka party ha ka 8 tarik Risaw ba kynthup Bah RK Basaiawmoit, B Mylliemngap, E Wahlang, M Lyngdoh, ER War, AN Lyngdoh bad Bah B Nongbri.