Bhah kam u CEM ia ki EM, ym pat rai sa na Ri Bhoi

Shillong, 22 Jymmang:
U Chief Executive Member ka KHADC u bah Pynshngain N Syiem mynta ka sngi u la bhah kam ia ki EM ka KHADC bad ha katei ka jingbhah kam la iohi ba u CEM u la pynhun ia ki saw ngut ki MDC ba kyntiap kyn hun da kaba ai bat ha kid a ki tnad kiba kham kongsan kum ka tnad khaii pateng, tnad khlaw, khajna nalor kiwei pat.
Ha katei ka jingbhah kam u CEM ia ki EM la iohi ba u Deputy CEM bah P.T Sawkmie u la ioh ban bat ia ka tnad Development, Health and Sanitation , katba u bah James Sylliang MDC ka Maw hati u la io hban bat ia ka tnad khaii pateng bad ka Enforcement. U MDC ka Mawkyrwat u bah Ha drian Lyngdoh u la ioh ban bat ia ka tnad Taxation, Water Resources and Fisheries katba ka kong Grace Mary ka ioh ban bat ia ka tnad khlaw (Forest) bad ka shong lok bad ia phet lok ( Marriage and Divorce).
Kiwei pat ki EM ha katei ka bhah kam u CEM ki kynthup ia u bah Antonio War , MDC Laitumkhrah u bat ia ka tnad pla tyngka bad ka Arts and culture katba u bah Lamphrang blah u ioh ba bat ia ka tnad Elaka bad Revenue. U bah Jansing Tynsong MDC Pynursla u ioh ban bat ia ka tnad Building bad Information and Technology, u bah Banteidor Lyngdoh MDC ka Mawkynrew u bat ia ka tnad Labour bad Sport and Youth Affairs bad u bah Donevan Kharwanlang u bat ia ka tnad Land bad Mine and Minerals.
Katba u CEM pat u bah pynshngain u bat ia ka tnad General Administration, Planning, ka iew, pule puthi, kynriah kam ki nongtrei bad kiwei pat ki tnad bym shym la bat da ki EM.Haba kren sha ki nongthohkhubor mynta ka sng u bah Syiem u la kyntait ba ka jingai bat ia ki tnad ba donkam sha ki saw ngut ki MDC kyntiap kynhun ka dei kaba la shah pynbor hynrei u la ong ba ka dei ka jingiapynbeit lang hapdeng jong ki.
“Nga ngeit skhem ba ki MDC kin sngewhun ia ka jingbhah kam jong nga, nga pyrshang katba lah ban pynhun lut ia baroh ki MDC” u la ong. U bah Syiem u la ong ruh ba haduh mynta ym pat lah ban rai ia uwei u EM bad shen un sa pynbna. Lah ban kdew ba u CEM um pat lah haduh mynta ruh ban shim rai la yn pynrung kam EM da u bah Albinus Lyngdoh ne da u bah Victor Rani.