“Bha kaba tlot ban ia kaba khlaiñ” ong u CEM

Shillong, 20 Risaw:
Ha ka sngi kaba kut jong ka dorbar ba ar sngi ka KHADC, u Lamphang ka Ing Dorbar u bah Mansturdy Nongrem u la dumok tyngeh ia ka Executive Committee ka KHADC namarba kalatlot shaba palat bad bun ki jingkylli ba la wanrah ha ing dorbar kam lah ban jubab, haba kylli na u CEM ka KHADC u bah Pynshngaiñ N Syiem kumno u sngew halor katei ka jingshah dumok ha u Lamphang, “Bha kaba tlot ban ia kaba khlaiñ” u la jubab.
Lah ban kdew ba mynhynin ka sngi kut dorbar u Lamphang bah Mansturdy Nongrem u la ong ba ki don bun tylli ki jingkylli ba ki dkhot ka ing dorbar ki la wanrah bad ki don 54 tylli hynrei napdeng kitei 23 tylli la wanrah ha ing dorbar, katba na baroh kitei ki jingkylli 31 tylli ki dei kiba ka Executive Committee kam lah ban ai jubab bad haba ia kheiñ ia ka percentage ka jinglah jong ka EC ka long tang 42.59%. “Ngi kwah ba ka EC ka dei ban lah 100 na ka shispah” ong u bah Mansturdy Nongrem hapoh ing dorbar. U Lamphang u la ong ruh ba ym lah ban pynmih ia ki proceeding dorbar namarba ka EC kam shym la jubab lut ia ki jingkylli.
Lah ruh ban kdew ba ha ka sngi sdang dorbar ka kong Teilinia Thangkhiew ka MDC na Mylliem konstitwensi ka la pynpaw ha ka ing dorbar ba haba ka EC kam lah ban jubab ki EM ki ju ong ba kin phah notis hynrei haduh ban da long dorbar biang sa kawei ruh ym ioh ia kata ka notis bad katei ka la pynlong ia ki MDC ban wanrah biang ia ka juh shi kajuh ka jingkylli . Halor kane ruh u Lamphang u la dumok ia ka EC ba kam lah ban ai notis sha ki dkhot ka ing dorbar.