Nongstoiñ, 16 ’lyngkot:
Ki nong bylla dewiong ka thain Shallang, kiba dei ruh ki Khasi, ki la ia kynduh jingeh shikatdei eh halor ka rukom bylla sngi, ha kaba kiba bun na ki nongbylla ki hap ruh ban shu shim wai ia ki jaka pynlang dewiong (Depu) kiba don ha ka thain Shallang, da ki phew hajar tyngka shisnem , na ki trai jaka tang ban shu ia ioh bylla sngi.
Katei ka paw shai ruh ha ka sngi Nyngkong jong ka taiew ha ka jingialang bala pynlong da ka Khasi Student Union (KSU), Lyngngam Hynnengbrei Area Unit ha ka shnong Nongdaju, ha kaba ka seng ka la pynpaw ia kitei ki jingeh ba ki nongbylla dewiong katei ka thain ki la iakynduh bad na ka liang jong ka seng ha katei ka jingialang, ka la iatai sani bha halor kumno ban ialeh bad thawlad ban weng noh ia kitei ki jingeh.
Haba ai jingkren ha katei ka jingialang na ka liang jong u samla K.S. Rongrin President ka KSU Lyngam Hynnengbrei, u la ong ba katei ka jingshah khniot bein ki nong bylla kiba dei ki jait bynriew Khasi Garo bad Lyngngam ka wan jia tang namar ka jingjur palat ki bar jylla, kiba la wan ban kurup bad kam trai ia ka bylla ka sngi ha katei ka thain, khlem ki kot ki sla kiba biang da kaba ki la sdang bad ialam ban shim wai ia ki jaka pynlang dewiong (Depu), tang ban kin shu ioh bsuh khlieh bad hadien pat ki sa kam trai syndon.
Shuh shuh u la ong ruh ba katei ka jingleh bad ialam jong ki bar jylla, ka la ktah pynban ia kiba dei ki trai shnong bad ki trai thain ha kaba kim iohlad shuh ban ia bylla ja kpoh, namar ba la wan ban shim wai bad thong pisa da ki bar jylla na ki trai jaka bad ki trai dewiong katei ka thain bad kumta lada ki jaitbynriew Khasi Lyngngam bad Garo ruh da ki kwah ban ioh bylla sngi kim banse ban hap bud ia katei ka lynti ba la ialam da ki bar jylla.
Kumta na ka liang jong ka seng, hadien katei ka jingialang ka la shim ruh ia ka rai ban ai por tang 10 sngi ia ki trai khyndew bad kumjuh ia ki trai dewiong ba ki dei ban beh noh ia baroh ki bar jylla kiba don ha katei ka thain lem kumta na ka liang jong ka seng kam banse ban hap shim pat da kiwei ki lad ki lynti ban pynher krad shi syndon ia kitei ki bar jylla ki bym biang kot biang sla.
Kiwei kiwei ki nongkren ha katei ka jingialang ka kynthup ia u samla U. Ryntong General Secretary ka KSU Lyngngam Hynnengbrei, u samla A.L. Nonglait General Secretary ka KSU na Mawshynrut Circle, ki nongialam shnong katei ka thain bad kiwei kiwei kiba la kren ia katei kajuh ka phang.
Na ka liang jong u nongthoh khubor u la lap ruh ba kiba bun hi ki nong bylla dewiong kiba don ha katei ka thain ki dei ki bar jylla bad haba pyrshang ban kylli hato ki wai ne em ia ka jaka ba ki bylla sngi na ki trai jaka, ka jubab na ki ka long ‘Em’ katba ha ba pyrshang pat ban kylli na ki Khasi kiba bylla sngi ha katei kajuh ka thain kila ong ba ‘Tang ban shu ioh bylla ngi hap ban wai ia ka jaka buh dewiong na ki trai bad ki shim haduh 35 hajar shisnem’ ym tang kata kitei ki nong bylla Khasi ki la iathuh ruh ba nalor ba ki trai jaka ki la shim ia ka bai wai na ki nongbylla ki dang shim ruh sa 100 tyngka ia ki trok ba wan buh bad pynhap dewiong ha ka jaka ka jong ki.
Phi don ban ong eiei?