Beh krad ka KSU NKH ia ki nonglute ka sorkar Assam

Nongpoh, 22 Naiwieng:
Ka KSU North Khasi ka la beh krad ia ki nongtrei ka Motor Vehicle Inspector (MVI) na ka jylla Assam kiba khrong bad lute ia ki trok kiba iaid ba ieng lyngba ka surok Shillong-Guwahati ba hap hapoh u pud u sam ka jylla Meghalaya. U Bah Vincent Makri u vice president u la ialam ia ki dkhot ka seng ban pynher krad ia kine ki MVI ka Assam kiba la pynlong kum ka ktem ban lute.
Ka KSU NKH ka la leh ia kane hadien ba la jingioh jingtip ba ki MVI na ka jylla Assam ki ju mlien ban khrong pisa jubor na ka por shapor na ki trok kiba iaid ba ieng lyngba ka GS road ha ki bynta jong ka Meghalaya ia kito kiba kit palat.
U la ong ba ka jingleh bad wan tuklar ki MVI na Assam  ka dei ka jingthombor ia ki nongniah trok ki bym tip ia ka ain ka kanun kiba na ka jylla Meghalaya.
“Ki MVI na Assam ki la ju leh ia kane ka kam beain wat ia ki kali rit ruh”, u la ong.