Beh krad ka KSU ia ki nongtrei ka Atomic Energy ba sorbe Uranium

Shillong, 25 Naiwieng:
Ha ka 24 tarik u naiwieng ka KSU South West Khasi Hills District ka la beh krad kumba 10 ngut eiei ki nongtrei jong ka Atomic Energy bad ki nongtrei jong ka Uranium Corporation of India Limited kiba la wan ban sorbe Uranium sha ki thaiñ Phlangdiloiñ ba dki thaiñ ka Langpa. Ka KSU ka la lap ba kitei ki briew ki dei kiba la wan sorbe Uranium lyngba ka jingiathuh jong ki hi ha ka por ba ki dkhot katei ka seng ki la kylli ia ki, la beh ia kitei ki ki briew da ki dkhot ka KSU Umdohlun Corcle bad ki dkhot ka KSU SWKH.
“Ngi pynrem ruh ia ka jinglong arsap jong ka Sorkar Meghalaya halor kane ka mat ba ki la ialam bakla ia uba bun balang. Ha ka dorbar jong ka State Legislative Assembly ngi la iohi ia ka jinglong arsap jong u Dr Mukul Sangma ha kaba u la ong ba ka sorkar jylla kam pat kyrkieh ha ka ban tih ia u uranium bad kan nym leh hi ruh ia kata khlem ka jing mynjur u paitbah phewse napoh napoh pat ka pyrshang kumno ban khlong ia une u marpoh khyndew u ban long ka jingtim iaka Jaitbynriew” ong ka kyrwoh na u General Secretary ka KSU SWKH u samla Forward Nongrem.
“Ngi dawa na ka sorkar. ba ka dei ban pynshai paitbah halor ka jingialam bakla jongka ia u paidbah halor ka ishu uranium. Ngi kyntu ruh ia ki sordar shnong bad ki trai khyndew jong kitei ki thain ban weng noh ia ka NOC ba kum kine ba la ailad ia ki briew UCIL ban sorbe uranium naduh u risaw 2015 haduh kyllalyngkot 2016 namar kane kan long ka jingtim iaka Jaitbynriew” ong shuh shuh katei ka kyrwoh.Ka kyrwoh ka byrngem ruh ba katei ka seng kan ym ailad da lei lei ruh ban tih Uranium ha katei ka thaiñ bad ka seng ka long kaba la khreh ban ia kynduh ia ki jingiatyngkhuh, “Ngin ym ailad da lei lei ruh, ngi long kiba lakhreh ban ia tyngkhuh” ong ka kyrwoh na u samla Nongrem. Ka kyrwoh khubor ka la pynkut da kaba ong “Ngi kyntu ruh ia ki paidbah katei ka thain ban long husiar namar ka jingpynbit pynbiang ban tih uranium da ka sorkar India ka iaid ryngkat bad ka jingshna ia ka surok Two lane lyngba ka SARDP na Nongstoin shaduh Mawthabah” ong katei ka kyrwoh.