Shillong: Ka HYC Mawlai Circle myn hynnin ka sngi ka la leit ban beh krad ia ki 6 ngut ki bar jylla kiba trei bylla sngi ha ophis ka FCI bad ki la leit beh ruh ia ka trai Canteen ha katei ka ophis bad khang tala artad ia ka Canteen jong ka kaba don ha katei ka ophis. U President ka HYC Mawlai Circle u bah donbok Kharlyngdoh u la ong ba ka HYC ka la shim ia katei ka sienjam dei hadien ba u General Manager jong ka FCI u A Kumar Gupta um shym la bat ia ka kular bad ka jingiakren bad katei ka seng kaba la long ha ka 4 tarik u nohprah, 2017 ha ka jingialang kaba la long ha Old Building , Laitumkhrah.
Ha katei ka jingiakren ka HYC ka la ong ba ka ophis FCI ka la kular ba haba don kino kino ki kam , kin ai kam ia ki Khasi ki trai muluk bad hadien katei ka jingbeh krad katei ka seng ka la leit ia kynduh biang ia utei u General Manager ban pynkynmaw ba nangne shakhmat u dei ban ai kam ia ki Khasi.