Beh ki nongdih ia ki khynnah rit ha rud shnong, shah kem ki 4ngut ha Mawkynring

Shillong:Myn hynnin ka sngi, ki bor shnong jong ka Mawkynring, kaba don ha Nongkynrih, hajan Laitlyngkot, ki la ioh bat ia 4ngut ki rangbah briew, kiba shongkai harud jong katei ka shnong bad kiba ia dih kyiad.
La iathuh ba ka jingjia, ka long ba katba ki khynnah rit na katei ka shnong, ki dang ia leit sha lum, hynrei kitei ki 4ngut kiba ia dih buaid, ki la khot ia kitei ki khynnah rit bad la iathuh ba haba kitei ki khynnah rit, kim shym la leit satia, ki la sdang sa ban beh ia ki bad ki khynnah rit, ki la ia phet sha shnong da ka jingtieng bad mar kumta hi, ki la iathuh briew ha shnong; ha kaba ki la ia mih sa ki paidbah shnong ban leit wad ia kitei ki saw ngut bad mar ia ioh bat ia kitei, ki la ialam sha ka iing dorbar shnong, kat haduh ban da aiti sha ki bor pulit ia kitei ki saw ngut.
Ka kong Claudia Lyngwa Superintendent of Police, East Khasi Hills District, haba iakren bad U Rupang, ka iathuh ba kitei kiba shah kem, kim shym la mynsaw eiei bad ki pulit, kin sa aiti ia ki sha ka jingtohkit jong ka kashari lashai ka sngi bad la iathuh ba kitei ki 4ngut ki la beh ia kitei ki khynnah rit bad halor katei ka jingbeh jongki, la shim ia ka jing ujor na kitei ki khynnah, ha kaba la pynlong da ka ejahar halor katei ka jingbeh jongki ia ki khynnah rit harud shnong.
U Rangbah Shnong ka Mawkynring, U Bah L Nongkynrih, haba iakren bad U Rupang, u iathuh ba ialade u don sha kawei pat ka jaka, namar ba ka don ka jingialang bad mar ia ioh jingtip halor katei ka jingjia, ula bthah ia ki dkhot jong ka shnong, ba kin ialam ia ki sha ka iing shnong bad ula pyntip ruh mar mar sha ki pulit, ha kaba ki pulit ki la wan shimti ia kitei ki saw ngut.
Kiwei pat ki lad khubor, ki iathuh ba ka jingjia, ka dei ha kaba kawei ka khynnah kynthei, ka leit ai ja u hynmen, uba trei lyngkha, hynrei kitei ki saw ngut, ynda haba ki iohi ia katei ka khynnah, ki la khot ia ka bad haba kam shym leit satia, kumta ki la beh ia katei ka khynnah bad katei ka la phet krad na katei ka jaka bad leit iathuh briew sha shnong halor katei ka jingjia. La iathuh ruh ba kitei kiba shah kem, kim dei satia kiba na katei ka shnong.
Ka video pat kaba la ioh da U Rupang, ka pyni ba la set ia kitei ki briew ha kawei ka kamra, ha kaba la antad, ba ka dei ka iing shnong bad la iohi ia ki riew rangbah, kiba ieng habar bad kiba khanglad ia ki paidbah, kiba thmu ban rung sha katei ka kamra, kaba ki don kitei ki saw ngut.