Beh jingsniew ka Thynroit da kaba iaid sawdong ka shnong

Shillong, 12 Nailar:
Ka shnong Thynroit kaba jngai kumba 10 km na Smit, hynne ka sngi ka la mih paidbah ban pyrta sawdong ka shnong ban beh krad noh ia ki kam bymman bad ki jingsniew na ka shnong.
Ki paidbah naduh ki khynnah skul, bad ki dkhot nongshong shnong ki la pynlong ia kane ka jingiaid paidbah ha ka shnong haka sien ba nyngkong ban pynher ia ka khubor sha baroh ki paidbah nongshong shnong ban nym ai lad satia ki jingsniew ha poh ka shnong ka thaw.
Ia ka jingiaid paidbah la ialam da ki nongkitkam shnong kynthup u Sordar Bah D Stiar bad u Secretary Bah H Warjri, ba la wan iashim bynta 9 tylli ki skul ba don ha kane ka shnong nalor kiwei pat ki paidbah, ki pulit ba la wan na Madanrting Police Station ba la wan ka Kong P Wahlang.
La kaweh lama ia kane ka jingiaid pyrshah jingsniew ha ka shnong da u BDO ka Mawkynrew Bah B Marbaniang uba la pynpaw ba ka kum kane ka long kaba donkam ban ialeh pyrshah ia ki jingsniew. “Ngi dei ban ialeh pyrshah ia ki jingsniew na ka kyiad, na ka jingshah ban bein ki kynthei bad kiwei kiwei ki jingsniew ha ka imlang sahlang”, la ong u BDO.
U la ong ba kane ka jingiaid paidbah ka long kum ka jingkyrsiew thiah ia ki kmie ki kpa ban hikai hinot ia ki khun ki kti bad kumjuh ka jingiatreilang bad ka shnong ka thaw ban pynduh ia ki jingsniew.
Katba ka Kong Wahlang, ka pulit kynthei ba peit na Madanrting, ka la ong ba ha ka jingiakynduh jingshem jongka, ia ki briew ba leh ia ki kam sniew, ka daw ba kongsan ka dei namar ka kyiad. “Ka kyiad ka dei ka tynrai ka jingsniew baroh”, la ong ka Kong Wahlang kaba kyntu ia ki briew khamtam ki kynthei ba kin shakhmat ban ialeh pyrshah ia ki kam bymman bad ban pyntip wut wut sha ki pulit haba ki iakynduh ia ki jingshah ban bein.
U Secretary ka shnong u Bah Warjri u la ong ba kane ka snem ka dei ka snem ba nyngkong ban iakhun ia ki jingsniew hapoh ka shnong bad kumjuh shabar. U la ong ba ka jingpynlong ia kane ka jingiaid paidbah ka long shi bynta ruh ban rakhe pyndonburom ia ka sngi laitluid jong ka ri kaban long ka 15 tarik Nailar kata ha ka sngi Nyngkong, ha kaba ka ri India kan sa dap 70 snem pura ka jinglait luid.