Shillong, 15 ‘lyngkot:
Ka Video kaba pyni ia ka jingialeh sngewbha u bah Julius Dorphang MLA ka Mawhati ka la saphriang sted lyngba ki internet kaba la iohi ba ki paidbah ki la pynsa-phriang lyngba ka facebook, ka whattapp bad ka la don ruh ha ka youtube.
Ha katei ka video la iohi ba ki la don haduh 9 ngut ki kynthei kiba ia shad bad kawei na ki la iohi ba ka dang sam beer, katba kiwei pat ki dang ia shad. Kiwei pat la iohi ba don kiba shu ieng pynkhih met malu mala katba kiwei pat ki don kiba khyrwait syngkai bad ka kaweh kti kaweh kjat ban shad kmen.
La iohi ia ki klat kiba dap da ki beer bad ki bilor Kingfisher kiba la pynieng ha ki miej. La iohi tang ar ngut ki shynrang ha katei ka video uwei na ki dei u khynnah samla uba ym shym la ithuh dur bha katba uwei pat dei u bah Julius Dorphang uba tap tuppia lieh bad ka coat putoi rong lieh.
U bah Dorphang u la ia shad pynshad kti bad kawei na kitei ki kynthei bad ka rkhie, hadien la iohi ba u tur sha ka jaka ba theh beer bad la iohi ba la theh ha ka klat jong u na ka mok kaba heh. Katei ka kynthei kaba ia shad bad u, ka la tur hajan jong u bad ka la kdup nadien. La iohi ba u bah Dorphang ba u phai sha ka bad ka phuh samrkhie.
Ha katei ka jingiashad khawai sngewbha la iohsngew ba ki pynrwai da ka sur jingrwai Hindi ‘Bebo oh Bebo’. Katba ka jingiashad khyrwait syngkai ka dang iaid la iohsngew ruh ba don napdeng kawei ka kynthei kaba kren da ka ktien phareng kaba ong ‘Selfie or what’ katba kawei pat ka kren da ka ktien Khasi ka ong ia kawei pat ka paralok jong ka ‘shuh pha ong’. Katei ka video ka jrong 59 sekhon.
Phi don ban ong eiei?