Shillong: La dep ban bhah kam na ka bynta ki Executive Member ha ka Executive Committee kaba thymmai kaba ialam da u bah Teinwell Dkhar kum u Chief Executive Member (CEM). Ha katei ka jingbhah kam ki MDC kiba la ioh ia ka kam EM ki long 5 ngut na ka UDP (kynthup ia u CEM), 4 ngut na ka NPP, 1 HSPDP bad 1 PDF.
Ki 5 ngut ki MDC ka UDP kiba ioh ia ka shuki EM ki long u bah Teinwell ( CEM), u bah Paul Lyngdoh MDC ka Jaiaw, u bah Titos W Chyne MDC ka Sohra, u bah Teibor Pathaw MDC ka Mawlai bad u bah Jambor War MDC ka Mawthadraishan. Na ka NPP pat ki long u bah Pyniaid Sing Syiem MDC ka Sohryngkham uba la bat ruh ia ka kam Deputy CEM, u bah Victor Ranee MDC ka jirang, u bah Rangkynsai Kharbuki MDC ka Umroi bad u bah Mitchel Wankhar MDC ka Laban Mawprem. Na ka HSPDP pat u bah Martle Mukhim bad na ka PDF pat ka kong Macdalyn Sawkmie Mawlong.
La dep ruh ban bhah kam ia kitei ki EM ba kin peit la ki jong ki jong ki tnad treikam bad katkum katei ka jingbhah kam u bah Teinwell CEM un bat ia ka General Administration, ka kam Forest Establishment, ki kam aiñ, ki kam thungkam bad ki kam pynkynriah kam bad kiwei pat ki tnad kiba ym don ba bat. U Deputy CEM u bah Pyniaid u bah ia ka kam pla tyngka bad ia ka Elaka.
U bah Paul lyngdoh u bat ia ka kam khaïi pateng, ka kam khyndew kam shyiap bad ka tnad pule puthi, u bah Titos W Chyne u la bat ia ka kam Coucil Building bad ki jingdon jingem jong ka Council, ka tnad Planning bad ka tnad kaba peit ia ki dawai kynbat ne ka Traditional Medicine. U bah Martle Mukhim u bat ia ka kam shongkha shongman ne ka Marriage and Divorce bad kumjuh ia ka roi ka par (Development), u bah Victor Ranee u bat ia ka kam lum pisa ne ka Revenue Collection, ka tnad ka koit ka khiah bad ka kam khuid kam suba.
U bah Teibor Pathaw u bat ia ka kam laisen sha ki nongbylla bar jylla ne ka Labour License bad ka kam pulit District Councilne ka Enforcement. U bah Mitchel Wankhar u bat ia ka Town Committee, Land bad ki mar pohkhyndew, ka kong Macdalyn Sawkmie Mawlong ka bat ia ka kam khajna (Taxation) bad ka Information and Technology, u bah Rangkynsai Kharbuki u bat ia ka kam Youth Affairs, Water Resources bad Arts and Culture bad u bah Jambor War pat u bat ia ka kam iew bad Fisheries.
Phi don ban ong eiei?