Bat mynder 11ngut na Nongpdeng

Shillong, 5 Nailar:
Ka shnong Mawlai Nongpdeng ka la ioh bat haduh 11 ngut ki mynder kiba wan sha kane ka shnong ha kane ka sngi u Blei. Katkum ka kyrwoh na ka FKJGP Mawlai circle, kane ka jingleh ka shnong Nongpdeng ka dei ban ai jingiaroh.
“Ka Dorbar Shnong Mawlai Nongpdeng, ym tang ban shakri ia u paidbah ha shnong lajong hynrei ruh ban peit pyrman pat ia ka jingwanrung kyrthep ki mynder ha ka Bri ka jong ngi”, la ong ka seng ha ka kyrwoh.
Ka seng ka pynpaw ia ka jingkmen ia ka shnong Mawlai kaba la shim khia ban peitngor ia ki mynder ba wan rung.Ka Seng ka kyntu ruh ia baroh ki shnong ym tang ha Mawlai hynrei baroh ki shnong jong ka Bri u Hynnietrep ba kin bud ia ki nuksa jong ka Dorbar Shnong Mawlai Nongpdeng bad ruh ba kin shim khia ban peitngor ia ka jingwanrung pathar jong ki mynder sha ka shnong jong ki namar kan buh shibun bah ki jingeh hadien habud.