Bat ki RBYF Umsning ia shi bus ki bar jylla ba khlem kot khlem sla, kiba thmu leit sha Lumshnong

Nongpoh: Hynnin ka miet ha ka por 11:30 baje ei ei mynmiet, ki dkhot ka RBYF Umsning Circle, ki la ioh ban bat ia shi bus ki bar jylla, kiba khlem kot khlem sla bad kiba thmu ban leit bylla sha Lumshnong Jaintia Hills.

Ia kitei ki bar jylla kiba don kumba 24 ngut ei ei, ki dkhot ka RBYF ki la ioh ban bat ha kawei ka jaka ha Nongthymmai Umsning, kata hadien ba la don ki para dkhot kiba pyntip ba katei ka bus kaba don ia u number AS 01 LC 1489, ka la kit da ki bar jylla, kaba ki dkhot ka RBYF ki Ia suba ba kitei ki briew kiba shong ha katei ka bus ki dei ki bym don ia ki kot ki sla kiba biang bad kaba la pynlong ia ki ba kin pyntip sha ki RBYF Umsning, na ka bynta ban bat bad ban kylli pyrthew ia kitei ki bar jylla kiba don ha katei ka Bus.

Haba ki dkhot ka RBYF Umsning, ki la bat ia katei ka bus ha Nongthymmai, ki la pyrshang ban kylli pyrthew ia kitei ki bat jylla, ba sha kano ka jaka ba ki thmu ban leit, hynrei ka jubab na ki kam long kaba shai, namar shiphang ki ong ban leit sha Shillong bad shiphang pat ki ong ban leit sha Lumshnong, kumta haba ka rukom jubab kam long kaba shai bad nalorkata ba kim don ia ki kot ki sla kiba biang, kaba la pynlong ia ki dkhot ka RBYF ba kin pynphai dientrai ia kitei ki bar jylla.

Haba iadei bad katei ka jingioh bat ia kitei ki bar jylla, kiba la thmu ban wan bylla sha ka jylla khlem ki kot ki sla kiba biang, la ki dei ki briew kiba wan na kano ka jaka, u Samla Balapynkmen Nongbri, Secretary, u la ong ba ka seng kan iai peitngor bha nangne shakhmat bad lada lap ba kino kino ki briew nabar jylla kiba thmu ban shu rung beain sha ka jylla khlem ki kot ki sla kiba biang, kaba mut ba ki dkhot ka seng kin pynphai beit ia ki sha ka jaka kaba ki wan.
Ha kajuh ruh ka por, utei u nongialam ka RBYF Umsning, u la kyntu ia kino kino ki briew kiba kwah ban wanrah nongbylla na shabar jylla, ba ki dei ban phah pynbiang ia ki kot ki sla, namar ka seng seng lada ka lap ia ki briew nabar ki bym biang ia ki kot ki sla, ki dkhot ka seng kin ym ailad, hynrei kin beh beit ia ki, u la bynrap.