Nongpoh: U nongniah bad nongbud jong kawei ka trok kaba don ia u number AS-01-NC-7796, ki la hap ban tam biang ia shibun ki niut ki nier, kaba ki la bret khlem akor ha surok Umsning By-pass, kata ka dei hadien ba ki nongialam bad ki dkhot ka RBYF Lumnongrim Unit, ki la lap ia ki bad kiba la phah ia u nongniah bad nongbud ba ki hap ban tam biang.
Katkum ka jingiathuh da ki nongialam ka RBYF, la ong ba katei ka trok ka dei kaba wan na Beltola bad kaba leit ban pynhap mar sha College of Agriculture University, Kyrdemkulai, hynrei haba ka la wanphai na katei ka jaka, ia ki jaboh jabain pat ki la leit ban bret ha Umsning By-pass, kaba don hajan ka wan Umpih.
Kumta haba la ioh jingtip halor katei ka jingwan bret jaboh da kitei ki nongniah trok, ki nongialam ka RBYF Lumnongrim Unit, ia kaba la ialam da u President, u samla Hynry Marngar, President RBYF lumnongrim unit, nangta u Balakmenlang Nongbri, President Umsning Circle bad u Shining kharsohnoh, ki la leit ban bat ia kitei ki nongniah bad kiba la btah ia ki ban tam biang, ia baroh katei ka niut, ba ki la bret ha katei ka jaka.
Haba iadei bad ka jingdon kiba bun ki nongniah trok, kiba mlien ban bret niut hapoh ka surok Umsning By-pass, na ka liang ka seng ka maham jur bad ki la ong ruh ba kin sa leh da kaba tyngeh, ia ki briew kiba bret niut pathar ha ki bynta ka surok Umsning By-pass.
very well done RBYF