Bat ka Sister ia ka Tablet ki khynnah Klass XII ha Pynursla

Shillong,4 Risaw:
Da ka jingkmen da ki hajar ngut ki khynnah klas XII ka jylla ki tuid ha kine ki ar sngi lai sngi ba la dep sha Madan Polo ban pdiang ia ka Tablet ba u Myntri Rangbah ka jylla u Dr.Mukul Sangma u la ai na ka bynta jong ki. Na ka 24 hajar ngut ba la mang kumba 12 hajar ngut ki khynnah pule klass XII ki la poi sha Polo ban shim ia kitei ki Tablet.
Ha Pynursla ki khynnah klass XII ka St.Anthony’s Higher Secondary School, wat la ki la wan ban shim da ka kti lajong hynrei haduh mynta kim pat ioh pyndonkam satia ia katei ka Tablet ba la ai u Myntri Rangbah na ka bynta jong ki.
U Rupang u la ioh jingtip na ki katto katne ngut ki khynnah klass XII ba haduh mynta ka Sister ba la khlieh ia katei ka skul kam pat shym la aiti ia ki Tablet ha ki bad ka dang bat sah halade . Katkum ka jingioh lum jingtip na ki khynnah klass XII katei ka skul la ioh jingtip ba kin sa ioh ia katei ka Tablet haduh ka 10 tarik mynta u bnai, namar ka Sister ka la ong ia ki ba kan ai ha ka 10 tarik mynta u bnai. Haba la pyrshang kylli ia ka daw ba ka Sister ka bat ia katei ka Tablet ki klass XII la iathuh ba ka daw ba kam shym la aiti ha ki ia ka Tablet dei namar ba ka dang long ka eksamin Selection jong ki.